ۇستىمىزدەگى جىلعى ناۋرىزدىڭ 7-نەن 8-نە قاراعان ءتۇنى كۋالا-لۋمپۋردان ۇشىپ شىققانىنا ەكى ساعاتتاي بولعان كەزدە ديسپەتچەر رادارىنان جوق بولىپ كەتكەن Boeing 777-200 ۇشاعى ەكيپاجدىڭ نەمەسە جولاۋشىلاردىڭ ءبىرىنىڭ ەركىمەن العان باعىتىنان باس تارتىپ, باسقا جاققا قاراي بۇرىلىپ كەتكەن بولۋى ابدەن مۇمكىن. بۇل تۋرالى مالايزيا پرەمەر-ءمينيسترى نادجيب رازاك مالىمدەمەسىنە سىلتەمە جاساعان قازتاگ حابارلادى.
«ءبىز ۇشاق بورتىنان جەرگە مالىمەت بەرىپ تۇراتىن جۇيەنىڭ (ACARS) سانالى تۇردە اجىراتىلىپ تاستالعانىن وتە جوعارى سەنىممەن ايتا الامىز. مۇنداي ارەكەتتى بورتتاعى الدەكىمدەردىڭ الدىن الا جوسپارلارىنا ساي عانا جاساۋى مۇمكىن», - دەدى سەنبى كۇنى ارنايى وتكىزگەن پرەمەر.
ۇكىمەت باسشىسى ازىرگە زەرتتەۋ جۇمىستارىنىڭ ءجۇرىپ جاتقانىنا سالماق سالىپ, اۋە كەمەسىنىڭ ۇرلانىپ كەتكەنى تۋرالى تۇجىرىمدى پىكىر ايتقان جوق.
سپۋتنيك جانە اسكەري رادارلاردىڭ مالىمەتتەرى بويىنشا, 370-رەيس شىنىندا ايتىلعان ۋاقىتتا كىلت بۇرىلىپ, باعىتىن باتىس جاققا قاراي تۇزەگەن. شىنىندا تاپ وسىنداي اقپار تاراعانى راس. بىراق مالايزيا بيلىگى كۇنى كەشەگە ونى مويىنداعان جوق ەدى. ەندى پرەمەر-مينيستر ۇشاقتى ىزدەستىرۋ جۇمىستارىنىڭ وسى باعىتتا ەكى بولجام بويىنشا جۇرگىزىلەتىنىن ايتتى. ولاردىڭ ءبىرىنشىسى تايلاندتان قازاقستانعا دەيىنگى ارالىقتى قامتىسا, ەكىنشىسى يندونەزيادان ءۇندى مۇحيتىنىڭ وڭتۇستىك بولىگىنە دەيىن سوزىلادى.
ەسكە سالا كەتەيىك, مالايزيا اۋە كومپانياسىنىڭ بورتىندا 227 جولاۋشىسى جانە 12 ەكيپاج مۇشەسى بار Boeing 777-200 ۇشاعى كۋالا-لۋمپۋردان بەيجىڭگە ۇشىپ شىققانىنا شامامەن ەكى ساعات وتكەندە كەنەتتەن جوق بولىپ كەتكەن ەدى. بۇل كەزدە ول وڭتۇستىك قىتاي تەڭىزى ۇستىندە, مالايزيانىڭ كوتا-بارۋ قالاسىنان 120 ميل جەردە, ۆەتنامنىڭ وڭتۇستىك جاعالاۋىنا جاقىن ماڭدا ۇشىپ بارا جاتقان بولاتىن.
مۇرات ايتقوجا.
دەرەككوز: قازتاگ.
فوتو: Kapital.kz/