پاۆلوداردا ءتىرى ادام قايتىس بولعاندار تىزىمىنە ەنگىزىلىپتى

پاۆلودار وبلىسىنداعى جاس انا 3 جىل بويى قايتىس بولعاندار تىزىمىندە بولعان. بۇل تۋرالى «24 kz» حابارلادى. پاۆلودار وبلىسىنىڭ تۇرعىنى سىمبات بەرتالينا ءوزىنىڭ قايتىس بولعاندار تىزىمىندە تۇرعانىن تەك قىزىن بوسانعاننان كەيىن بىلگەن. بالانى ۇيىنە شىعارعان ساتتە اكەسى تۋ تۋرالى كۋالىك الۋعا حالىققا قىزمەت كورسەتۋ ورتالىعىنا بارادى. سىمباتتىڭ 3 جىل بويى قايتىس بولعاندار تىزىمىندە تۇرعانى دا سول كۇنى بەلگىلى بولدى. وسىعان بايلانىستى ولار نارەستەگە قۇجات راسىمدەۋدە قيىندىقتارعا تاپ كەلدى. 2011 جىلى سىمباتتىڭ ۇلكەن اپايى قىمبات دۇنيەدەن وتكەن بولاتىن. قاتەلىك سول كەزدە جىبەرىلسە كەرەك. ال حالىققا قىزمەت كورسەتۋ ورتالىعىنداعى  قىزمەتكەرلەر بۇل شيكىلىككە تۇسىنىك بەرۋدەن باس تارتتى. «ءوزىمدى قايتىس بولعاندار تىزىمىنە ەنگىزگەنىن ەستىگەندە, قاتتى قوبالجىدىم. مەنى قالاي اپاممەن شاتاستىرىپ العان؟ قازىر وسى ورەسكەل قاتەلىك سالدارىنان بالاما تيەسىلى قۇجات پەن جورگەك پۇلدى الا الماي ءجۇرمىن»,-دەيدى سىمبات بەرتالينا. پاۆلودار وبلىستىق پروكۋراتۋراسى ءبىرىنشى باسقارماسىنىڭ پروكۋرورى دانيار ىسقاقوۆ بۇگىندە وسى ماسەلەگە قاتىستى تەكسەرۋ جۇرگىزىلىپ جاتقانىن جانە نارەستەگە جاقىن ارادا قۇجات بەرىلەتىنىن مالىمدەدى. ءامىرحان الماعانبەتوۆ. دەرەككوز: «24 kz». فوتو: «24 kz».