«Teiken» پروموۋتەرلىك ۇيىمىنىڭ جەتەكشىسى اكيحيكو حوندا ورتا سالماق دارەجەسىندەگى IBF, IBO تۇجىرىمدارى بويىنشا الەم چەمپيونى گەننادي گولوۆكين مەن WBA (super) بەلبەۋىنىڭ يەگەرى ريوتا مۋراتا اراسىنداعى جەكپە-جەككە قاتىستى مالىمدەمە جاسادى, دەپ حابارلايدى Egemen.kz.
ء«بىزدىڭ تاڭداۋ جوق. سوندىقتان امالسىز كۇتىپ وتىرمىز. ەگەر جەكپە-جەك ءساۋىر ايىندا وتپەيتىن بولسا, ريوتا مۋراتانىڭ ودان كەيىن شايقاسقا شىعۋعا زاۋقى سوعا قويماس. ءبىز ونى قولدايمىز. راسىندا دا ءساۋىر ايىندا جەكپە-جەك ۇيىمداستىرىلماسا, وندا ەكى بوكسشى اراسىنداعى كەزدەسۋ مۇلدە وتپەۋى ىقتيمال. ودان باسقا نۇسقانى كورىپ تۇرعان جوقپىن», دەدى پروموۋتەر ءوز ويىمەن ءبولىسىپ.
ەستەرىڭىزگە سالا كەتەيىك, گولوۆكين-مۋراتا اراسىنداعى كەزدەسۋ وتكەن جىلدىڭ 29 جەلتوقسانىندا وتۋگە ءتيىس بولعان. الايدا جاپونيادا كارانتين تالاپتارى كۇشەيىپ, شايقاس مەرزىمى كەيىنگە شەگەرىلگەن ەدى.