بۇگىن ۇكىمەت وتىرىسىندا مينيسترلەر كابينەتى قۇرامىنا جاڭادان قوسىلعان مينيسترلەر انت قابىلدادى, دەپ حابارلايدى Egemen.kz.
«قازاقستان رەسپۋبليكاسىنىڭ ۇكىمەتى تۋرالى كونستيتۋتسيالىق زاڭعا سايكەس, ۇكىمەت قۇرامىنا العاش كىرگەن ادامداردىڭ انت قابىلداۋ ءراسىمىن باستايمىز», دەدى وتىرىستى اشقان پرەمەر-مينيستر ءاليحان سمايىلوۆ.
وسىدان كەيىن قر اقپارات جانە قوعامدىق دامۋ ءمينيسترى اسقار وماروۆ, ادىلەت ءمينيسترى قانات مۋسين, دەنساۋلىق ساقتاۋ ءمينيسترى اجار عينيات, يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ, ەنەرگەتيكا ءمينيسترى بولات اقشولاقوۆ, ۇلتتىق ەكونوميكا ءمينيسترى الىبەك قۋانتىروۆ انت قابىلدادى.
ءوز كەزەگىندە جاڭا مينيسترلەر «قازاقستان رەسپۋبليكاسىنىڭ حالقى مەن پرەزيدەنتى الدىندا ءوز وتانى - قازاقستان رەسپۋبليكاسىنىڭ ەكونوميكالىق جانە رۋحاني دامۋ ىسىنە بارلىق كۇش-جىگەرىم مەن ءبىلىمىمدى جۇمساۋعا, مەملەكەتتىڭ كونستيتۋتسياسى مەن زاڭدارىن قاتاڭ ساقتاۋعا, ءوزىمنىڭ ءىس-ارەكەتىمدە زاڭدىلىق پەن ادىلەتتىلىك, ازاماتتىق, ۇلتارالىق جانە كونفەسسياارالىق تاتۋلىق پرينتسيپتەرىن ۇستانۋعا, قازاقستان حالقىنا ادال قىزمەت ەتۋگە, ءوز ەلىمنىڭ مەملەكەتتىلىگى مەن دۇنيەجۇزىلىك قوعامداستىقتاعى بەدەلىن نىعايتا بەرۋگە انت ەتەمىن» دەپ سالتاناتتى تۇردە انت بەردى.