كەشە استانادا «1540 قارارىنىڭ وڭىرلىك جانە جاھاندىق قارۋسىزدانۋ مەن تاراتپاۋ ۇدەرىستەرىنە ۇلەسى – 1540 قارارىنىڭ 10 جىلدىق مەرەيتويىنا» تاقىرىبىندا «ورتالىق ازيا+» پىشىنىندە ەكى كۇندىك سەمينار باستالدى.
بۇل حالىقارالىق اۋقىمدى شارانى قازاقستان رەسپۋبليكاسىنىڭ سىرتقى ىستەر مينيسترلىگى بۇۇ-نىڭ قارۋسىزدانۋ ماسەلەلەرى جونىندەگى باسقارماسىمەن (UNODA) جانە بۇۇ قاۋىپسىزدىك كەڭەسىنىڭ 1540 كوميتەتىمەن (1540 كوميتەت) بىرلەسىپ ۇيىمداستىرۋدا.
سەمينار بۇۇ قاۋىپسىزدىك كەڭەسى تۇراقتى مۇشەلەرىنىڭ وكىلدەرىن, سونداي-اق, 30-دان استام ازيا مەملەكەتتەرىن قوسا العاندا, «ورتالىق ازيا+» پىشىنىندە ءوتىپ جاتىر. بۇل شاراعا مەملەكەت وكىلدەرىنەن بولەك, بىرقاتار حالىقارالىق جانە وڭىرلىك ۇيىمداردىڭ, ونىڭ ىشىندە ەقىۇ, تمد, ەو, ماگاتە, حقتۇ (حيميا قارۋىنا تىيىم سالۋ جونىندەگى ۇيىم) ۇيىمدارىنىڭ وكىلدەرى قاتىسۋدا.
اتاپ وتەتىن جايت – بۇل حالىقارالىق باسقوسۋ 1540 قارارىنىڭ 10 جىلدىق مەرەيى جانە گااگادا وتەتىن يادرولىق قاۋىپسىزدىك ءجونىندەگى سامميت قارساڭىندا ۇيىمداستىرىلىپ وتىر. سوندىقتان بارلىق ءمۇددەلى تاراپتار ءۇشىن 1540 قارارى بويىنشا ۇلتتىق دەڭگەيدە ءتاجىريبەلەرىمەن ءبولىسىپ, ونىڭ وڭىرلىك جانە جاھاندىق قارۋسىزدانۋ جانە تاراتپاۋ سالاسىنا قوسىپ وتىرعان ۇلەسىن باعامداۋ, سونداي-اق, تاراتپاۋ جانە تەرروريزمگە قارسى ءىس-قيمىل سالاسىنداعى وڭىرلىك جانە حالىقارالىق ىنتىماقتاستىقتى نىعايتۋ بويىنشا ۇسىنىستار ەنگىزۋگە تاماشا مۇمكىندىك بولىپ تابىلادى.
1540 قارارى بۇۇ قاۋىپسىزدىك كەڭەسى تاراپىنان وسى باس ۇيىم جارعىسىنىڭ 6-بابىنا ءسايكەس 2004 جىلدىڭ 24 ساۋىرىندە قابىلدانعان بولاتىن. اتالعان قارار بارلىق مەملەكەتتەردى يادرولىق, حيميالىق نەمەسە بيولوگيالىق قارۋ تۇرلەرىن جاساۋعا, ساتىپ الۋعا, وندىرۋگە, يەلەنۋگە, تاسۋعا, قايتا بەرۋ نەمەسە قولدانۋعا ارەكەتتەنەتىن مەملەكەتتىك ەمەس سۋبەكتىلەردى قولداۋدىڭ كەز كەلگەن تۇرىنەن باس تارتۋعا جانە وزدەرىنىڭ ۇلتتىق پروتسەدۋرالارىنا سايكەس ءتيىستى زاڭداردى قابىلداپ, ءتيىمدى قولدانۋعا مىندەتتەيدى.
1540 قارار قابىلدانۋىمەن بايلانىستى بۇۇ قاۋىپسىزدىك كەڭەسىنىڭ ارنايى كوميتەتى قۇرىلعان بولاتىن. ول بۇۇ قاۋىپسىزدىك كەڭەسىن مەملەكەتتەردىڭ قارار تالابىن ورىنداۋى تۋرالى اقپاراتتاندىرىپ وتىرۋى ءتيىس.
قازاقستان تاراتپاۋ سالاسىنداعى ساياساتىن دايەكتىلىكپەن جۇرگىزىپ, 1540 قارارىنىڭ ەرەجەلەرىن ءتيىمدى جۇزەگە اسىرۋ بويىنشا شارالار قابىلداپ كەلەدى. 2011 جىلى قازاقستان 1540 قارارىنىڭ مىندەتتەرىن ورىنداۋ بويىنشا وسىنداي شارانى وڭىرلىك دەڭگەيدە ۇيىمداستىرعان بولاتىن.
قازاقستان بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە كانديدات, ەگەر وسى لاۋازىمعا سايلانعان جاعدايدا بۇۇ-نىڭ اتالعان ماڭىزدى ورگانى اياسىندا يادرولىق قاۋىپسىزدىك جانە تاراتپاۋ سالاسىنداعى ماسەلەلەردى ودان ءارى ىلگەرىلەتۋ نيەتىندە.
ساۋلەبەك ءبىرجان.