مەملەكەت باسشىسى نۇرسۇلتان نازارباەۆ داڭقتى بالەت ءبيشىسى, قازاق كسر جانە كسرو حالىق ءارتىسى رامازان باپوۆتىڭ ومىردەن وزۋىنا بايلانىستى ونىڭ وتباسى مەن تۋىستارىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى جەدەلحاتتا رامازان باپوۆتىڭ ءوز ءومىرىن ونەرگە ارناپ, زور تابىستارعا قول جەتكىزگەنىنە توقتالدى.
«ول ۇزاق جىل اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا جەمىستى ەڭبەك ەتىپ, ايتۋلى سپەكتاكلدەردەگى باستى پارتيالاردى ۇلكەن شەبەرلىكپەن ورىنداپ, ونەرسۇيەر قاۋىمنىڭ ىستىق ىقىلاسىنا بولەندى. ءوز ونەرىن الەمنىڭ كوپتەگەن ەلىنىڭ ساحنالارىندا دا پاش ەتتى. ۇستازدىق قىزمەتپەن اينالىسىپ, شاكىرتتەر تاربيەلەدى. 2008 جىلى مەنىڭ شاقىرۋىممەن ەلگە ورالىپ, تۋعان تەاترىنىڭ شىعارماشىلىق تۇرعىدان ودان ءارى كەمەلدەنە تۇسۋىنە لايىقتى ۇلەسىن قوستى», – دەلىنگەن جەدەلحاتتا.
جەدەلحات سوڭىندا نۇرسۇلتان نازارباەۆ قازاقستان حالقى ونىڭ ەسىمى مەن ەڭبەگىن ءاردايىم ەستە ساقتايتىنىن اتاپ وتكەن.