شۋاقتى كوكتەم كوكشەتاۋعا شاتتىعىن الا كەلدى. قالا اكىمى جارقىن جۇماعۇلوۆ مۇحتار اۋەزوۆ كوشەسىندەگى ەكى بىردەي 108 پاتەرلى تۇرعىن ءۇيدىڭ كىلتتەرىن قۋانىش يەلەرىنە تابىس ەتتى.
«قولجەتىمدى تۇرعىن ءۇي-2020» باعدارلاماسىمەن بوي كوتەرگەن كوپ قاباتتى عيماراتتار قۇرىلىسىنا قازىنا قورجىنىنان 926 ميلليون تەڭگە ءبولىنىپ, ونى باس مەردىگەرلەر «سترويقۇرىلىس-2030» جانە «سترويتەحسەرۆيس كوكشەتاۋ» جاۋاپكەرشىلىگى شەكتەۋلى سەرىكتەستىكتەرى تولىق يگەردى. جايلى پاتەرلەر نەگىزىنەن سوعىس جانە ەڭبەك ارداگەرلەرىنە, الەۋمەتتىك تۇرعىدا ناشار قورعالعان جاندارعا, جاس وتباسىلارعا, بالالار ءۇيىنىڭ تۇلەكتەرىنە بەرىلدى. بۇل ساناتتاعى كىسىلەردىڭ سانى 74 ادامدى قۇراپ وتىر.
سونداي-اق, حالىقارالىق ايەلدەر مەرەكەسى قارساڭىندا, «بىرلىك» شاعىن اۋدانىندا اتا-انالار مەن وقۋشىلار اسىعا كۇتكەن جاڭا مەكتەپ كەشەنى ەسىگىن ايقارا اشتى. وقۋ-تاربيە كەشەنىندە 216 ورىندىق مەكتەپ پەن 80 ورىندىق بالالار باقشاسى قاتار ورنالاسىپ وتىر. مۇندا قازاق ءتىلى, ماتەماتيكا, بيولوگيا, حيميا, فيزيكا, ينفورماتيكا, اعىلشىن ءتىلى كابينەتتەرى ءتيىستى جابدىقتارىمەن جارقىراپ تۇر. زاماناۋي سپورت زالى مەن اسحانا دا اسەمدىگىمەن كوز تارتادى.
قۋانىشتى شاراعا جينالعاندار زامان تالابىنداعى قۇرىلىستىڭ تيىمدىلىگىن اتاپ كورسەتىپ, ونى ساپالى اتقارعان «ءمارمار» جشس ۇجىمىنا العىستارىن ءبىلدىردى.
باقبەرگەن امالبەك,
«ەگەمەن قازاقستان».
كوكشەتاۋ.
–––––––––––––––
سۋرەتتەردى تۇسىرگەن
ەرمۇرات دوسىموۆ.