ادەتتە شىنار اعاشى جالاڭاش جارتاستىڭ شىڭىندا نە قياسىندا وسەدى. جانە ول جالعىز-جارىم عانا بولادى. ءبىز قىسى قىسقا ءارى جىلى شىمكەنتتەن شىعىپ, شاڭعى سپورتىنىڭ ءبىر ءتۇرى – فريستايلدىڭ اكروباتيكاسى بويىنشا جاقىندا سوچي وليمپياداسىنا قاتىسقان ەكى قىزدى سونداي شىنارلارعا بالاپ ەدىك. سونىڭ ىشىندە جاھاننىڭ كىل مايتالماندارى باس قوسقان الاماندا الدىڭعى لەكتەن تابىلىپ, التىنشى ورىنعا تابان تىرەگەن 18 جاسار جانبوتا الدابەرگەنوۆاعا دەگەن ىقىلاسىمىز مۇلدەم بولەك.
بۇل ءبىر «جۋاننىڭ جىڭىشكەرىپ, جىڭىشكەنىڭ ۇزىلۋگە» قاراعان كوكوزەك شاعىندا ورىن الدى. جابۋلاپ اپارعان جۇيرىكتەرىمىز جابدىقتان كورىنبەي, جالعىز دەنيس تەننىڭ دۇبىرىنە مالدانىپ تۇرعان كەز. سول تۇستا كۇتپەگەن جەردەن جانبوتا ەسىمدى فريستايلشى قىزىمىزدىڭ جاي وعىنداي جارق ەتە تۇسكەنى پاسەيگەن كوڭىلدى كەنەت كوتەرىپ ءجىبەرگەن جاعىمدى جاڭالىقتىڭ بىرىنە اينالدى.
شىمكەنتتەن شىققان شىمىر قىزدىڭ بىرنەشە بەلەستى باعىندىرىپ كەلىپ, قورىتىندىدا العاشقى التىلىقتىڭ اۋماعىنا تۇراقتاۋى ناعىز ەرلىككە پارا-پار ءجايت بولدى.
بۇگىندە تاريح قويناۋىنا كەتىپ بارا جاتقان XXII قىسقى وليمپيا ويىندارىنا وڭتۇستىك ءوڭىرىنەن ءۇش سپورتشى قاتىسسا, سونىڭ ۇشەۋى دە ءبىر باپكەردىڭ – مۇرات ءابلياتيفوۆتىڭ شاكىرتتەرى ەكەن. سولاردىڭ ءبىرى جانبوتا ەدى. ت ۇلىمى جەلبىرەگەن قىزىمىز ءوزىن جاسپىن دەمەدى. الدىڭعى ەكى ىرىكتەۋ سىناعىنان دا ماڭدايى جارقىراپ وتە شىققان ول ەكى فينالدىق تارتىستىڭ العاشقىسىندا التىنشى اسۋعا اياق ارتتى. تەك مەدالدار ۇلەسىن تالاسقا سالعان تورتتىكتىڭ تورەلىگىنە عانا قاتىسا العان جوق.
ەڭ ءبىر شەگەلەپ ايتاتىن نارسە, ايداي الەمگە اتىن شىعارىپ, اتاعىن اسپانداتىپ جاتقان جانبوتانىڭ سپورتتىڭ بۇل تۇرىمەن اينالىسا باستاعانىنا تىم كوپ ۋاقىت بولماعان. بار-جوعى 2,5 جىل عانا. سپورت اتتى سايىستىڭ سىباعاسىنان تيتتەي عانا حابارى بار كەز كەلگەن ادام مۇنىڭ قاس پەن كوزدىڭ اراسىنداي قىسقا مەرزىم ەكەنىن ايتپاي-اق بىلەدى. سويتسەك, جاستايىنان سپورتقا قۇمارتىپ وسكەن جانبوتا سول كەزگە دەيىن گيمناستيكامەن اينالىسىپ كەلىپتى. ونى اتاسى ءماجيت 4 جاسىنان اتاقتى جەرلەستەرى نەللي كيم شىققان سپورت مەكتەبىنە ارقالاپ تاسيدى. ورىسشا ءبىر اۋىز ءسوز بىلمەيتىن جانبوتا قازاقشا مۇلدە «قاقپايتىن» گالينا نيكولاەۆا اتتى جاتتىقتىرۋشىنىڭ قولىنا تاپ كەلەدى. ءبىر جىلدان كەيىن ول العاشقى جۇلدەسىنە قول جەتكىزەدى. ۇلكەن جارىستاردىڭ بىرىندە ەكىنشى ورىن الادى دەپ تۇرعان ساتتە بورەنە ۇستىندە ورىنداعان ءمىنسىز سەكىرىسى ءۇشىن كەنەتتەن ءبىرىنشى ورىنعا شىعادى. وسىلاي سول جارىستا ەكى بىردەي ءبىرىنشى ورىن بەرىلىپ, جانبوتا سپورتتاعى العاشقى ءىرى جەڭىسىن تويلايدى.
بۇل 2000-جىلداردىڭ باسى ەدى. ول كەزدەرى سپورتقا مەملەكەت تاراپىنان ءدال قازىرگىدەي قارجى بولىنە قويماعان. سوندىقتان ءار سپورتشى جارىسقا قاتىسۋ ءۇشىن جولاقىسى مەن جاتىن ورنى, ىشەر اس-سۋى ءۇشىن قاراجاتتى ءوز قالتاسىنان شىعارادى. وسىعان وراي جانبوتانىڭ اتاسى ءماجيت پەن اكەسى ەركىن دە تاپقان-تايانعاندارىنىڭ ءبىر ءبولىگىن سول ءۇشىن بولەك جينايدى. ۇيدە ىشپەي-جەمەي كەتسە دە جانبوتانىڭ جارىسىنا دەگەن 100 مىڭ تەڭگە ءاردايىم ساقتاۋلى تۇرادى. وسىنىڭ ارقاسىندا ءبۇلدىرشىن بالاپان رەسەي, تۇركيا جانە جاپونيا سياقتى ەلدەردە وتكەن كوپتەگەن حالىقارالىق جارىستارعا قاتىسىپ ۇلگەرەدى.
باسىندا ءبارى وسىلاي بولىپ جالعاسىپ كەتە بەرەتىندەي بولىپ كورىنگەن. جارىستان جارىسقا تاجىريبەسى ارتىپ, ءجۇلدەسىنىڭ سانى مولايا تۇسكەن جانبوتا الدابەرگەنوۆا قازاق گيمناستيكاسىنىڭ ءبىر جۇلدىزى بولىپ شىعاتىن شاققا جاقىنداپ كەلە جاتقان. ءبارىن ءبىر جاتتىقتىرۋشىنىڭ ءبىر جولعى كەسىرلىگى مەن قياناتى بۇزىپ جىبەردى. وسىدان ءۇش جىلعا جۋىق ۋاقىت بۇرىن جانبوتا سانكت-پەتەربۋرگتە وتكەن حالىقارالىق تۋرنيرگە قاتىسىپ, جۇلدەلى ورىنداردىڭ بىرىنەن كورىنەدى. بىراق بۇل قۇرامانى باستاپ بارعان باس جاتتىقتىرۋشىعا ۇنامايدى. سەبەبى, جانبوتا ونىڭ وسى جارىسقا قاتىسقان تۋعان قىزىنان وزىپ كەتىپتى. وسىعان ىزا بولعان ۇستازسىماق ونى نەۆا جاعاسىنداعى قالاعا جالعىز قالدىرىپ كەتەدى. تەك الماتىدان بارعان باپكەر جاردەمىمەن ەلگە ورالعان قىز سودان قايتىپ جاڭاعى جاتتىقتىرۋشىنى كورگىسى كەلمەيدى. بۇدان حاباردار بولعان اتاسى مەن اكەسى سوسىن جانبوتانى فريستايلعا اۋىستىرۋعا ۇيعارىم جاسايدى. سول جىلعى تامىز ايىندا 15 جاسار جەتكىنشەك جەكە جاتتىقتىرۋشىسى گالينا يۆانوۆناعا جولىعىپ, ءوزىنىڭ ويىن ايتادى. ال ۇستازى قاتتى قينالىپ تۇرسا دا, قايسار قىزدىڭ ايتقانىنان قايتپايتىنىن ءبىلگەن سوڭ, بۇعان رۇقساتىن بەرۋگە ءماجبۇر بولادى. ءسويتىپ, ونىڭ رازىلىعىن العان بۇلار №8 قىسقى سپورت مەكتەبىندەگى فريستايلدىڭ اكروباتيكا تۇرىنەن باپكەر مۇرات ابلياتيفوۆكە حابارلاسادى. بۇعان دەيىن ءۇش فريستايلشىنى باپتاپ جۇرگەن مامان قاتارعا ءتورتىنشى ەتىپ جانبوتانى دا الادى.
البەتتە, بۇرىن اياعىنا شاڭعى بايلاپ كورمەگەن ءجاسوسپىرىم قىزعا ءبارىن باسىنان قايتا باستاۋ وڭايعا تۇسپەيدى. بۇعان قوسا, وڭتۇستىك قازاقستاندا قىسقى سپورت ءتۇرلەرىنەن جاتتىعۋعا ارنايى جاعداي جاسالماعان. جالعىز عانا «مۇز سارايى» بار. ال فريستايل ءۇشىن ترامپلين كەرەك. سوندىقتان مۇنىڭ ورنىن تولتىرۋ ءۇشىن فريستايلشىلار «مۇز سارايداعى» باتۋتتا سەكىرەدى. جانبوتا دا ءوز جاتتىعۋىن وزگە ارىپتەستەرى سەكىلدى وسىندا باستايدى. مۇرات باستاعان توپ تولىققاندى جاتتىعۋلار وتكىزۋ ءۇشىن ارا-تۇرا اق قار ىزدەپ, وسكەمەنگە تارتادى. بۇدان تىسقارى قىتاي, اقش, شۆەيتساريا, فينليانديا, بەلارۋس, يتاليا جانە ۋكراينا ەلدەرىندە بولىپ, ءبىراز جاتتىعۋلار وتكىزەدى.
جاراتقاننىڭ اۋىزدارىنا سالعانى ما, جانبوتانىڭ اتاسى دا, اكەسى دە سول كەزدەرى-اق ونىڭ سوچي وليمپياداسىنا قاتىسۋى كەرەكتىگىن ايتا بەرىپتى. اكەسى ەركىن ءتىپتى قىزىنىڭ وسى ويىندارعا بارىپ قايتقانىن كورۋدىڭ ءوزى ۇلكەن ارمانى ەكەنىن ءجيى اۋزىنا الىپتى. مۇنى ەستىگەن جانبوتادا دا ەس قالمايدى. جالپى سالماعى 28 كيلو بولاتىن جابدىقتارىن ارقالاپ, كۇن سايىن جانكەشتى جاتتىعۋلارىن جاساۋدان ءبىر جالىقپايدى. بۇل كىسىلەردىڭ تىلەگى قابىل بولعانى شىعار, 2013 جىلدىڭ قاڭتار ايىندا قايسار قىز امەريكادا وتكەن كەزەڭدىك جارىستا جەتكىلىكتى ۇپاي جيناپ, ليتسەنزيانى جەڭىپ الادى. مۇنى ەستىگەن اتاسىنىڭ قۋانىشىندا شەك بولمايدى.
قازىر شىمكەنتتەن شىققان شىنار قىزدىڭ ءبىرىنشى كەزەكتەگى جانكۇيەرلەرى ساپىندا اجەسى نازىمگۇل سىرلىباەۆا مەن اناسى گۇلناز جۇمابەكقىزى بار. سوسىن, ارينە, ونىڭ تۋ سىرتىندا ءتىلەۋىن تىلەپ, قابىرعالى قالىڭ ەلى – كۇللى وڭتۇستىك ءوڭىرى مەن بارشا قازاقستان جۇرتى تۇر.
سەرىك ءپىرنازار,
«ەگەمەن قازاقستان».
شىمكەنت.