2019 جىلدان باستاپ قازاقستاندا 264 قاراماعىنداعى قىزمەتكەرلەردىڭ سىبايلاس جەمقورلىعى ءۇشىن مەملەكەتتىك قىزمەتشى جازالاندى. بۇل تۋرالى وكق بريفينگىندە مەملەكەتتىك قىزمەت ىستەرى اگەنتتىگىنىڭ باقىلاۋ دەپارتامەنتىنىڭ ديرەكتورى ەرلان ساپاروۆ حابارلادى, دەپ جازادى Egemen.kz.
باعىنىشتىلاردىڭ سىبايلاس جەمقورلىق ارەكەتتەرى ءۇشىن باسشىلاردىڭ جاۋاپكەرشىلىگى تۋرالى زاڭ 2019 جىلعى 10 جەلتوقساننان باستاپ قولدانىسقا ەنگىزىلدى. سول ساتتەن باستاپ قاراماعىنداعىلاردىڭ سىبايلاس جەمقورلىعى ءۇشىن 264 مەملەكەتتىك قىزمەتشى جازالانعان.
«وسى جىلدىڭ توعىز ايىندا قاراماعىنداعىلاردىڭ سىبايلاس جەمقورلىق ارەكەتتەرى ءۇشىن توعىز ساياسي مەملەكەتتىك قىزمەتشى وتستاۆكاعا كەتتى. التى جاعدايدا وتستاۆكا قابىلدانبادى, بىراق بۇل قابىلدانباعان التى جاعدايدىڭ بەسەۋىندە ساياسي مەملەكەتتىك قىزمەتكەرلەر ءارتۇرلى تارتىپتىك جاۋاپكەرشىلىككە تارتىلدى», دەدى ەرلان ساپاروۆ.