نىعماتۋلين بجزق باسشىسىنا قاتاڭ ەسكەرتۋ جاسادى

ءماجىلىس وتىرىسى كەزىندە ساقتاندىرۋ نارىعى تۋرالى زاڭ جوباسىن تالقىلاعان دەپۋتاتتار بجزق باسشىسىنا  ەرلى-زايىپتىلاردىڭ بىرلەسكەن اننۋيتەتى تۋرالى سۇراق قويدى. بىراق جانات قۇرمانوۆ قويىلعان سۇراققا ناقتى جاۋاپ بەرە المادى.

«وسى زاڭنىڭ جاڭا نورمالارى ەكىنشى نۇسقانى كەڭەيتەدى. ارينە, ومىردە ءارتۇرلى جاعداي بولادى, مىسالى ەرلى-زايىپتىنىڭ ءبىرى قايتىس بولۋى مۇمكىن نەمەسە اجىراسادى. سوندىقتان زاڭ بويىنشا وسىنداي ماسەلەلەر شەشىلەدى. شارتقا قوسىمشادا جەكە تولەم كەستەسى بويىنشا وسى ماسەلەنى شەشۋگە بولادى», دەدى قۇرمانوۆ.

باسشىنىڭ تۇسىنىكسىز جاۋابىنا اشۋى كەلگەن نۇرلان نىعماتۋلين ودان «قالاي شەشۋگە بولادى؟» دەپ قايتا سۇرادى.

«شەشۋگە بولادى دەپ ءۇشىنشى رەت ايتىپ وتىرسىز. ءسىز ءبىر ايدىڭ ىشىندە حالىق الدىنا شىعىپ, سۇراقتارعا (جەتكىلىكتى شەك جايلى) نەگە جاۋاپ بەرمەگەنىڭىز ەندى تۇسىنىكتى بولدى. ءبىر ماسەلەگە جاۋاپ بەرە المايسىز. تىكەلەي سۇراققا سول جاقتان دا, وڭ جاقتان دا كىرەتىن جول ىزدەپ تۇرسىز. دەپۋتات تىكەلەي سۇرادى عوي. قالاي باسقارىپ ءجۇرسىز, ەگەر سونى بىلمەسەڭىز؟ ەكى نەگىزگى قادام جاساۋ كەرەك. سونى ايتا الماي تۇرسىز», دەپ سىنادى سپيكەر.

سونداي-اق ن. نىعماتۋلين قۇرمانوۆقا ماجىلىسكە دايىندالىپ كەلۋ كەرەك ەكەنىن ەسكەرتتى.