ەلباسى نۇرسۇلتان نازارباەۆتىڭ اتىنا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي شەت مەملەكەتتەر باسشىلارىنان قۇتتىقتاۋ حاتتار مەن جەدەلحاتتار كەلىپ ءتۇستى, دەپ جازادى Egemen.kz elbasy.kz-كە سىلتەمە جاساپ.
قىتاي حالىق رەسپۋبليكاسىنىڭ توراعاسى سي تسزينپين قىتاي حالقىنىڭ جانە ءوزىنىڭ اتىنان ەلباسىنى جانە بارشا قازاقستاندىقتاردى ايتۋلى مەرەكەمەن قۇتتىقتاپ, وسى جىلدار ىشىندە قازاقستاننىڭ تۇڭعىش پرەزيدەنتىنىڭ باسشىلىعىمەن مەملەكەتتى دامىتۋ ىسىندە قول جەتكىزىلگەن تابىستاردى اتاپ ءوتتى.
ء«سىزدىڭ كورەگەن باسشىلىعىڭىزبەن قازاقستان مەملەكەت قۇرۋ ىسىندە تابىستى دامۋ جولىنا ءتۇسىپ, زور جەتىستىكتەرگە جەتتى, ەۋرازيا وڭىرىندەگى بەدەلدى مەملەكەتكە اينالدى. قىتاي مۇنى تاتۋ كورشى ءارى ماڭگىلىك كوپجاقتى ستراتەگيالىق ارىپتەس رەتىندە قۋانىشپەن قابىلدايدى. قازاقستاننىڭ 2050 جىلعا دەيىنگى مەملەكەتتىك دامۋ ستراتەگياسىن تابىستى جۇزەگە اسىرىپ, ەلدىڭ الەۋەتىن نىعايتۋدى جانە حالىقتىڭ ءال-اۋقاتىن ارتتىرۋدى جالعاستىرا بەرەتىنىنە سەنىمدىمىز», دەلىنگەن سي ءتسزينپيننىڭ جەدەلحاتىندا.
تۇركيا رەسپۋبليكاسىنىڭ پرەزيدەنتى رەجەپ تايپ ەردوعان نۇرسۇلتان نازارباەۆ پەن قازاقستان حالقىنا تاۋەلسىزدىكتىڭ وتىز جىلدىعىنا وراي تىنىشتىق پەن باق-بەرەكە تىلەپ, جىلى لەبىزىن جولدادى.
رەجەپ تايپ ەردوعان قازاقستان مەن تۇركيا اراسىنداعى قارىم-قاتىناستىڭ قارقىندى دامۋىنا توقتالا كەلە, ەلباسىنىڭ تىكەلەي قولداۋىمەن قۇرىلعان تۇرىك مەملەكەتتەرى ۇيىمىنىڭ بيىلعى 12 قاراشادا ستامبۋل قالاسىندا وتكەن ءسامميتىنىڭ ناتيجەلەرىن اتاپ ءوتتى.
تاجىكستان رەسپۋبليكاسىنىڭ پرەزيدەنتى ەمومالي راحمون قازاقستان جەتىستىكتەرى نۇرسۇلتان نازارباەۆتىڭ ەسىمىمەن تىكەلەي بايلانىستى ەكەنىن ايتتى.
«ەگەمەندىك جىلدارىندا باۋىرلاس قازاقستان بولاشاققا ۇمتىلعان, زاماناۋي مەملەكەت قۇرۋ جولىندا تولاعاي تابىستارعا قول جەتكىزىپ, بۇگىندە حالىقارالىق ارەنادا لايىقتى ورىن الدى. قازىرگى قازاقستاننىڭ جەتىستىكتەرىنىڭ بارلىعى ءسىزدىڭ ەسىمىڭىزبەن جانە ءسىزدىڭ قازاقستان رەسپۋبليكاسىنىڭ تۇڭعىش پرەزيدەنتى لاۋازىمىنداعى كوپجىلدىق جەمىستى مەملەكەتتىك قىزمەتىڭىزبەن تىعىز بايلانىستى», دەلىنگەن ەمومالي راحموننىڭ جەدەلحاتىندا.
قىرعىز رەسپۋبليكاسىنىڭ پرەزيدەنتى سادىر جاپاروۆتىڭ حاتىندا: ء«سىزدىڭ قىرعىزستان-قازاقستان اراسىنداعى دوستىق پەن تاتۋ كورشىلىككە نەگىزدەلگەن بەرىك ستراتەگيالىق سەرىكتەستىك جانە وداقتاستىق قاتىناستاردى قالىپتاستىرۋعا قوسقان ۇلەسىڭىزدى جوعارى باعالايمىن. بايلانىستارىمىز الداعى ۋاقىتتا دا ءبىزدىڭ ەلدەرىمىزدىڭ يگىلىگى جولىندا ۇزدىكسىز دامىپ, تەرەڭدەي بەرەدى. وسى مۇمكىندىكتى پايدالانا وتىرىپ, سىزگە زور دەنساۋلىق پەن جاڭا تابىس, ال باۋىرلاس قازاقستان حالقىنا باق-بەرەكە تىلەيمىن», دەلىنگەن.
تۇرىكمەنستان پرەزيدەنتى گۋربانگۋلى بەردىمۇحامەدوۆتىڭ جەدەلحاتىندا دا قازاقستاننىڭ ەگەمەندىكتىڭ وتىز جىلى ىشىندە قول جەتكىزگەن جەتىستىكتەرى ايتىلعان.
«تاۋەلسىزدىك جىلدارى قازاقستان ءوز مەملەكەتتىلىگىن نىعايتۋ, حالىقتىڭ تۇرمىسىن جاقسارتۋ جانە حالىقارالىق ارەنادا ابىرويىن ارتتىرۋ جولىندا زور تابىستارعا جەتتى.
ءبىز جاقىن كورشىمىزدىڭ جەتىستىكتەرى ءۇشىن قۋانامىز جانە ستراتەگيالىق سيپاتقا يە ەكىجاقتى قاتىناستاردى دامىتۋعا دايىنبىز», دەدى گۋربانگۋلى بەردىمۇحامەدوۆ.