29 جەلتوقسانعا جوسپارلانعان IBF جانە IBO تۇجىرىمدارى بويىنشا الەم چەمپيونى گەننادي گولوۆكين مەن WBA (Super) بەلبەۋىنىڭ يەگەرى, جاپونيالىق ريوتا مۋراتا اراسىنداعى جەكپە-جەك كوروناۆيرۋستىڭ وميكرون شتامىنىڭ تارالۋىنا بايلانىستى كەيىنگە قالدىرىلعانى ءمالىم, دەپ حابارلايدى Egemen.kz.
ەندى ەكى بوكسشى اراسىنداعى ۇزاق كۇتكەن كەزدەسۋ كەلەسى جىلدىڭ كوكتەمىندە وتپەك. بۇل تۋرالى گەننادي گولوۆكيننىڭ پروموۋتەرى توم لەففلەر حابارلادى.
«جاپونيا تاريحىنداعى ەڭ ۇلكەن جەكپە-جەكتىڭ كەيىنگە قالدىرىلعانى بىزگە دە وڭاي سوققان جوق. گەنانىڭ كومانداسى رەتىندە ءبىز بۇل شايقاستى اسىعا توسقان بولاتىنبىز. بۇل جەكپە-جەك الداعى جىلدىڭ كوكتەمىندە وتەدى دەگەنگە سەنەمىز. ازىرگە قاي ايدىڭ قاي كۇنىندە ۇيىمداستىرىلاتىنىن تاپ باسىپ ايتۋ مۇمكىن بولماي تۇر. مۇمكىندىك بولسا بۇل بوكس كەشىن جەدەل ۇيىمداستىراتىن بولامىز», دەيدى پروموۋتەر.