اسقار مامين قحف پرەزيدەنتى بولىپ قايتا سايلاندى

قحف پرەزيدەنتىنىڭ 2016-2021 جىلدار ارالىعىنداعى جۇمىس تۋرالى ەسەبى, فەدەراتسيانىڭ جارعىسى مەن ەرەجەسى, شتاتتىق قۇرىلىمى قارالدى, باسقارۋ جانە باقىلاۋ ورگاندارىنىڭ سايلاۋى وتكىزىلدى. كونفەرەنتسيا قاتىسۋشىلارىنىڭ ءبىراۋىزدان شەشىمىمەن اسقار مامين قازاقستان حوككەي فەدەراتسياسىنىڭ پرەزيدەنتى لاۋازىمىنا قايتا سايلاندى.

ا. مامين ءوز سوزىندە قازىرگى ۋاقىتتا ەرلەر اراسىنداعى الەمدىك رەيتينگتە قازاقستان كومانداسى 19-دان 13-ورىنعا كوتەرىلگەنىن اتاپ ءوتتى. وسى ۋاقىت ىشىندە قازاقستاندىق قۇراما كوماندالار 19 الەم چەمپيوناتىنا, قىسقى ازيا ويىندارىنا, ەكى قىسقى دۇنيەجۇزىلىك ۋنيۆەرسياداعا, وليمپيادا ىرىكتەۋ تۋرنيرلەرىنە قاتىسىپ, 14 مەدال جيىنتىعىن جەڭىپ الدى.

قحف پرەزيدەنتى حوككەي ليگالارىنىڭ, ونىڭ ىشىندە جاستار, ايەلدەر جانە اۋەسقوي ليگالاردىڭ جوعارى دامۋ قارقىنىن, چەمپيوندىق تيتۋل مەن قازاقستان رەسپۋبليكاسىنىڭ كۋبوگى ءۇشىن باسەكەلەستىكتىڭ ارتقانىن اتاپ ءوتتى.

بالالار مەن جاسوسپىرىمدەر حوككەيىنىڭ دامۋىنداعى وڭ ديناميكانىڭ ارتىپ كەلە جاتقانى بايقالادى. رەسپۋبليكادا 30 حوككەي مەكتەبى بار, ولاردا 269 جاتتىقتىرۋشى جۇمىس ىستەيدى. كوماندالار مەن ويىنداردىڭ سانى ارتىپ كەلەدى. وتكەن كەزەڭمەن سالىستىرعاندا حوككەيمەن اينالىساتىن بالالار سانى 32%-عا – 7,3 مىڭنان استامعا ءوستى.

حوككەيگە دەگەن قىزىعۋشىلىقتىڭ ايتارلىقتاي ءوسۋى اياسىندا سپورت ينفراقۇرىلىمىنىڭ قولجەتىمدىلىگى مەن ساپاسىن ودان ءارى ارتتىرۋ بويىنشا جۇيەلى جۇمىستار جۇرگىزىلىپ جاتىر. ەلىمىزدە الەمدىك دەڭگەيدەگى جاڭا زاماناۋي مۇز سارايلارى اشىلدى. بۇگىندە قر-دا 34 جابىق مۇز ارەناسى مەن مودۋلدەرى بار. جاقىن ارادا پاۆلودار قالاسىندا مۇز ءمودۋلىن جانە قوستاناي قالاسىندا مۇز ارەناسىن اشۋ جوسپاردا بار.

2022 جىلعى قاڭتاردا حوككەيشىلەردى دايارلايتىن «JAS NOMAD» رەسپۋبليكالىق باعدارلاماسىنىڭ ءبىرىنشى بلوگىن جانە Salem Hokei جوباسىن ىسكە قوسۋ جوسپارلانعان, ونىڭ ماقساتى –  بالالاردى سپورتقا تارتۋ.  بۇگىندە سايت, ءموبيلدى قوسىمشا ازىرلەندى, كيىم-كەشەك پەن قۇرال-جابدىقتار ساتىپ الىندى, ولار دەمالىس كۇنگى حوككەي جوباسىنا قاتىساتىن حوككەي مەكتەپتەرىنە بەرىلەدى.

الداعى كەزەڭدە فەدەراتسيا وڭىرلەردە حوككەيدى دامىتۋ, بجسم-نەن باستاپ جاستار حوككەيى مەن كاسىبي حوككەيگە دەيىن حوككەيشىلەردى دايارلاۋدىڭ تولىققاندى كلۋبتىق جۇيەسىن قۇرۋ, ايەلدەر حوككەيىنىڭ گەوگرافياسىن كەڭەيتۋ, وڭىرلەردە جاڭا حوككەي مەكتەپتەرىنىڭ, قىزىلوردا, شىمكەنت, اتىراۋ جانە اقتاۋدا جاستار حوككەي كلۋبتارىنىڭ, ورالدا كاسىبي كلۋبتىڭ اشىلۋىنا جاردەمدەسۋ جونىندەگى جۇمىستى كۇشەيتەدى.