«تاۋەلسىزدىك كەمەسىندە» اتتى كورمەدە سۋرەتشى نۇرجان ساۋىتبەكوۆ تە ءوزىنىڭ جاڭا تۋىندىسىن كورسەتتى. ول جاس اۆتورلاردى قولداۋ مەن شابىتتاندىرۋدىڭ قاجەتتىگىن اتادى, دەپ حابارلايدى Egemen.kz.
نۇرجان ساۋىتبەكوۆ — نۇرسۇلتان نازارباەۆ قورى سىيلىعىنىڭ لاۋرەاتى, قر سۋرەتشىلەر وداعىنىڭ مۇشەسى, ت.جۇرگەنوۆ اتىنداعى قازۇوا كوللەدجىندە ارنايى پاندەردىڭ وقىتۋشىسى.
قىلقالام شەبەرى 2015 جىلى بەينەلەۋ ونەرى سالاسىنداعى جەتىستىگى ءۇشىن قوردىڭ سىيلىعىن يەلەندى.
«بۇل مەنىڭ شىعارماشىلىعىمدى دامىتۋعا دەم بەردى, ەڭبەگىمنىڭ تىڭ قىرىن اشۋعا سەپتىگىن تيگىزدى. مۇنداي قولداۋ كاسىبىمنىڭ ەلگە كەرەك ەكەنىنە دالەل. دارىندى قازاقستاندىق جاستاردى جۇيەلى نەگىزدە كەشەندى قولداعانى ءۇشىن قورعا ريزامىن. جاس سۋرەتشىلەردى ەلەپ-ەسكەرۋ, قولداۋ, شابىتتاندىرۋ قاجەت. تالانتتى جانداردى كوتەرمەلەۋدە مۇنىڭ ماڭىزى زور», دەيدى ول.
«تاۋەلسىزدىك كەمەسىندە» ەكسپوزيتسياسىندا كەسكىندەمە, ءمۇسىن, گرافيكا, ديزاين جانە ساندىك-قولدانبالى ونەر سالاسىنداعى 100-دەن استام بىرەگەي تۋىندى قويىلعان. اۆتورلار شىعارماسى ارقىلى ەلىمىزدىڭ ۇلتتىق مادەنيەتىنىڭ ەرەكشەلىگىن بەينەلەپ, قازاقستاننىڭ اسەم تابيعاتىن پاش ەتتى, سۇيىكتى قالانىڭ اتموسفەراسىن كورسەتتى. ول بەينەلەۋ جانە ساندىك-قولدانبالى ونەردى ناسيحاتتاۋعا, پاتريوتيزمگە تاربيەلەۋگە جانە جاس ۇرپاققا تاۋەلسىزدىكتىڭ قۇندىلىعىن دارىپتەۋگە باعىتتالعان.
نۇرسۇلتان نازارباەۆ قورىنىڭ 2021-2022 وقۋ جىلىنداعى ستيپەندياتتارى – نازىم مەيرامبەك پەن دانا نۇرشاەۆا دا تۋىندىلارىن ۇسىنعان بولاتىن.
نازىم ابستراكتسيا, ينتەرەر ديزاينى جانە نۇكتەلىك كەسكىندەمە ءتارىزدى بىردەن ءۇش ەڭبەگىن ۇسىندى. ال دانا نۇرشاەۆا الماتىداعى اباي اتىنداعى وپەرا جانە بالەت تەاترىنا ارنالعان كارتيناسى ارقىلى كۇلاش بايسەيىتوۆا, شارا جيەنقۇلوۆا, ەۆگەني برۋسيلوۆسكي جانە ت.ب. ۇلتتىق ونەر قايراتكەرلەرىنە قۇرمەت كورسەتتى.
ايتا كەتەيىك, تاۋەلسىزدىكتىڭ مەرەيتويىنا ارنالعان شىعارماشىلىق جوبانى نۇرسۇلتان نازارباەۆ قورى مەن ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ كوللەدجى ۇيىمداستىردى.
ەكسپوزيتسيانى اشقان نۇرسۇلتان نازارباەۆ قورى جوباسىنىڭ اعا ۇيلەستىرۋشىسى گۇلنار ەرشيمانوۆا: «نۇرسۇلتان نازارباەۆ قورى تالاي جىل بويى ءوزىن جانە ەلدى دامىتقىسى كەلەتىن دارىندى, جاسامپاز بالالاردى ىزدەۋمەن, ولارعا قولداۋ كورسەتۋمەن اينالىسىپ كەلەدى. بۇل كورمە سياقتى الاڭدار جاي عانا ەكسپوزيتسيا ەمەس, جاس سۋرەتشىلەردىڭ وزدەرىن تانىتۋدىڭ, ەڭبەگىن ەلگە كورسەتۋدىڭ بىرەگەي مۇمكىندىگى», دەدى.
2021 جىلدىڭ 30 جەلتوقسانىنا دەيىن جالعاساتىن كورمە سوڭىندا اۆتورلاردىڭ ەڭبەكتەرى قامتىلعان ارنايى كاتالوگ جارىق كورەدى.