كەشە ۇلىبريتانيانىڭ ليۆەرپۋل قالاسىندا وتكەن كاسىپقوي بوكس كەشىندە قازاقستاندىق فيرۋزا ءشارىپوۆا يرلانديالىق كەتي تەيلورمەن كۇش سىناستى.
جەڭىل سالماق دارەجەسى بويىنشا WBC, WBA, WBO جانە IBF نۇسقالارىنىڭ چەمپيوندىق بەلبەۋى ساراپقا سالىنعان باسەكەنىڭ ءفاۆوريتى تەيلور ەدى. 35 جاستاعى يرلانديانىڭ وكىلى كەزىندە لوندون وليمپياداسىنىڭ جەڭىمپازى, بەس دۇركىن الەم جانە التى دۇركىن ەۋروپا چەمپيونى اتانعانىن جانكۇيەرلەر جاقسى بىلەدى. 10 راۋندقا سوزىلعان جەكپە-جەكتىڭ قورىتىندىسى بويىنشا بارلىق تورەشى جەڭىستى ءبىراۋىزدان يرلانديالىق سپورتشىعا بەردى. ەسەپ – 98:92, 97:92, 96:93. ءسويتىپ, كەتي تەيلور ءابسوليۋتتى الەم چەمپيونى اتاعىن ءساتتى قورعادى.
27 جاستاعى فيرۋزا ءشارىپوۆا ءۇشىن بۇل كاسىپقوي رينگتەگى ەكىنشى جەڭىلىسى. بۇعان دەيىن ول وسىدان بەس جىل بۇرىن, ءوزىنىڭ تۇساۋكەسەر كەزدەسۋىندە رەسەيلىك سوفيا وچيگاۆادان ۇتىلعان بولاتىن. سودان كەيىن ءشارىپوۆا قاتارىنان 14 جەكپە-جەكتە جەڭىسكە جەتتى.