2025 جىلعا دەيىن مەملەكەتتىك باعدارلامالار اياسىندا 30 مىڭ جاستى, ونىڭ ىشىندە 10 مىڭ اۋىل جاستارىن جۇمىسقا ورنالاستىرۋ جوسپارلانىپ وتىر. بۇل تۋرالى قر اقپارات جانە قوعامدىق دامۋ ءمينيسترى ايدا بالاەۆا «تاۋەلسىزدىك ۇرپاقتارى» اتتى رەسپۋبليكالىق جاستار فورۋمىندا ايتتى, دەپ حابارلايدى Egemen.kz.
«تاۋەلسىزدىكتىڭ 30 جىلىندا جاستار ساياساتىندا اۋقىمدى دا قارقىندى جۇمىستار اتقارىلدى. 1993 جىلى تۇڭعىش پرەزيدەنتىمىزدىڭ جارلىعىمەن «بولاشاق» حالىقارالىق ستيپەندياسى تاعايىندالدى. باعدارلامانىڭ ارقاسىندا 15 مىڭنان استام جاس الەمنىڭ ەڭ وزىق ۋنيۆەسيتەتتەرىندە وقۋعا مۇمكىندىك الدى. بۇگىندە شەتەلدەن وقىپ كەلگەن تۇلەكتەردىڭ 54 پروتسەنتى مەملەكەتتىك ورگانداردا, 30 پروتسەنتى جەكە سەكتوردا, 16 پروتسەنتى حالىقارالىق ۇيىمدار مەن ۇلتتىق كومپانيالاردا قىزمەت ەتەدى. 1992 جىلى تالانتتى جاستاردى قولداۋعا ارنالعان «دارىن» مەملەكەتتىك جاستار سىيلىعى تاعايىندالدى», دەدى ايدا بالاەۆا.
ونىڭ ايتۋىنشا, بۇگىنگى كۇنگە دەيىن 296 جاس اتالعان سىيلىقتىڭ يەگەرى اتاندى.
«سونداي-اق جاس عالىمداردى قولداۋ ماقساتىندا جىل سايىن ۇزدىك عىلىمي جوبالارعا دىنمۇحامەد قوناەۆ جانە مۇحتار اۋەزوۆ اتىنداعى ارنايى سىيلىقتار تابىستالادى. مەملەكەتتىك جاستار ساياساتىنداعى وزگەرىستەر ەكى مىڭىنشى جىلداردان باستاپ تىڭ سەرپىن الدى. «قازاقستان جاستارى» مەملەكەتتىك باعدارلاماسى, مەمملەكەتتىك جاستار ساياساتىنىڭ تۇجىرىمداماسى قابىلدانىپ, «جاسىل ەل», «جاستار تاجىريبەسى», «ديپلوممەن – اۋىلعا», «سەرپىن» جوبالارى ىسكە قوسىلدى. «جاسىل ەل» باعدارلاماسى بويىنشا 2005-21 جىلدارى 44 ملن 300 مىڭ ءتۇپ اعاش ەگىلىپ, 149 مىڭ گەكتار جەر وڭدەلدى. 300 مىڭنان استام جاس جۇمىسپەن قامتىلدى. بۇل ناتيجەلى جوبا الداعى ۋاقىتتا دا جالعاسىن تابادى. 2025 جىلعا دەيىن 30 مىڭ جاستى, ونىڭ ىشىندە 10 اۋىل جاستارىن جۇمىسقا تۇرعىزۋ جوسپاردا بار», دەپ قوستى اقپارات مينيسترلىگىنىڭ باسشىسى.