وسى ايدىڭ ورتاسىنان باستاپ رەسپۋبليكالىق ماڭىزى بار «سامارا-شىمكەنت» كۇرە جولى اقىلى نەگىزدەگى جۇيەگە قوسىلادى. اقىلى جول ءتاريفى جەڭىل كولىكتەرگە 1 شاقىرىمعا – 1 تەڭگە, جۇك كولىكتەرى مەن اۆتوبۋستارعا تەحنيكالىق كولەمىنە بايلانىستى 5 پەن 25 تەڭگە ارالىعىندا بولادى. بۇل تۋرالى قىزىلوردا وبلىستىق جولاۋشىلار كولىگى جانە اۆتوموبيل جولدارى باسقارماسى حابارلاپ وتىر.
وبلىس اۋماعىنداعى اۆتوموبيل جولدارىنىڭ جالپى ۇزىندىعى – 3 397 شاقىرىم. ونىڭ 1 016 شاقىرىمى – رەسپۋبليكالىق, 557 شاقىرىمى – وبلىستىق, قالعانى اۋداندىق ماڭىزى بار اۆتوموبيل جولدارى. وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى قايرات ءابسۇلتانوۆتىڭ ايتۋىنشا, 2019 جىلى ەل ۇكىمەتىنىڭ قاۋلىسىمەن بەكىتىلگەن ينفراقۇرىلىمدى دامىتۋدىڭ «نۇرلى جول – 2020-2025» مەملەكەتتىك باعدارلاماسى اياسىنداعى 7 جاڭا اقىلى جول ۋچاسكەسىنە بيىل ءوڭىر اۋماعىنان وتەتىن رەسپۋبليكالىق ماڭىزى بار 812 شاقىرىمدىق اۆتوموبيل جولى قوسىلادى. وندا اۆتوموبيلارالىق باقىلاۋ اركالارى ورناتىلىپ, جۇيەنى پايدالانۋشىلارعا قىزمەت كورسەتەتىن ورتالىقتار اشىلدى.
اقىلى جۇيەگە ەنگىزىلگەن اۆتوموبيل جولدارىندا «اشىق» جۇيەسى قولدانىلماق. سونداي-اق كولىكتەردىڭ ءوتۋى ارنايى بەينەكامەرالار جانە ارنايى جابدىقتاردىڭ كومەگىمەن باقىلاۋ اركالارىنا بەكىتىلگەن.
«قازاۆتوجول» ۇك» اق وبلىستىق فيليالى ديرەكتورىنىڭ ورىنباسارى شانجارحان مىرزاباي ينفراقۇرىلىمدى دامىتۋدىڭ «نۇرلى جول 2020-2025» مەملەكەتتىك باعدارلاماسى شەڭبەرىندە ەلىمىزدەگى 11 مىڭ شاقىرىمدى قۇرايتىن اۆتوجول اقىلى جۇيەگە اۋىساتىنىن اتاپ ءوتتى. اقىلى ۋچاسكەنى پايدالانۋعا ەنگىزۋ تۋرالى بۇيرىققا قول قويىلعان. سوعان سايكەس, ءى تەحنيكالىق ساناتتاعى ۋچاسكەلەردەگى «شىمكەنت – قىزىلوردا», «نۇر-سۇلتان – پاۆلودار», «شىمكەنت – وزبەكستان شەكاراسى», «ششۋچينسك – كوكشەتاۋ», «قاپشاعاي – تالدىقورعان», «شىمكەنت – تاراز», «تاراز – قاينار» باعىتتارىنا اقىلى جۇيە 15 قاراشادان باستاپ ەنگىزىلەدى.
قىزىلوردا وبلىسى