قر پرەمەر-ءمينيسترى اسقار مامين ەلىمىزدە وقۋ وردالارىنىڭ جەتىسپەۋشىلىگى مەن ءبىلىم بەرۋ ساپاسىن جاقسارتۋ ماسەلەلەرىن شەشۋ باعىتىندا قانداي شارالار قابىلدانىپ جاتقانىن ايتىپ بەردى, دەپ حابارلايدى Egemen.kz.
مينيسترلەر كابينەتىنىڭ باسشىسى بۇل ماسەلەدە ەلىمىزدە بولىپ جاتقان دەموگرافيالىق پروتسەستەرگە نازار اۋدارۋ قاجەت ەكەنىن اتاپ ءوتتى.
«سوڭعى ون جىلدا بالا تۋ سانى ەكى ەسەگە ارتتى, سايكەسىنشە, وقۋ ورىندارىنىڭ سانى مۇلدەم باسقاشا. وسىعان بايلانىستى ءبىز بەس جىل ىشىندە مىڭ مەكتەپ سالىپ ءبىتىرۋىمىز كەرەك. ياعني, جىل سايىن 200 مەكتەپتەي», دەدى اسقار مامين باق وكىلدەرىمەن كەزدەسۋدە.
پرەمەر بۇگىنگى تاڭدا ەلىمىزدە ءبىلىم بەرۋ سالاسىنىڭ وزىندە ينۆەستيتسيالىق تارتىمدى بولا باستاعان مەحانيزم قۇرىلعانىن ايتتى.
«بيىل 160 جەكەمەنشىك مەكتەپ سالىنادى. ياعني, جەكە كاپيتال بۇگىندە ءبىلىم بەرۋ جوبالارىن قارجىلاندىرادى. ولار ءوز ينۆەستيتسيالارىن جان باسىنا قارجىلاندىرۋ ارقىلى وتەيدى. مۇنداي كوپتەگەن مودەلدەر بار. ءبىز بيىل 300-گە جۋىق مەكتەپتى ىسكە قوسامىز. ءبىزدىڭ الدىمىزدا تۇرعان مىندەت - بەس جىل ىشىندە مىڭ مەكتەپ, مەنىڭ ويىمشا, ءبىز ونى جۇزەگە اسىرىپ جاتىرمىز», دەپ سەندىردى اسقار مامين.
پرەمەر-مينيستر ءبىلىم بەرۋ ساپاسى تۋرالى ۇمىتپاۋ ماڭىزدى ەكەنىن اتاپ ءوتتى. بۇگىنگى تاڭدا مۇعالىم ماماندىعىنىڭ بەدەلىن ارتتىرۋ بويىنشا جۇمىس جۇرگىزىلۋدە جانە بۇل ماماندىققا مىقتى تۇلەكتەر بارادى. ءبىلىم بەرۋ ەلدىڭ باسەكەگە قابىلەتتىلىگىنىڭ باستى ماسەلەسى.