پارلامەنت سەناتىنىڭ ء«وڭىر» دەپۋتاتتىق توبىنىڭ باسشىسى ەرىك سۇلتانوۆ, سەناتور ءالىمجان قۇرتاەۆ جانە دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ بولعان توپ سولتۇستىك قازاقستان وبلىسىنا ىسساپارمەن كەلدى. 11 قاراشادا تۇستەن كەيىن جەتكەن ولار سول كۇنى كەشكە وبلىستىق اكىمدىكتە «ەڭبەك كۇشى ارتىق وڭىرلەردەن ازاماتتاردى ەڭبەك كۇشى تاپشى ايماقتارعا كوشىرۋ ماسەلەسىنە» ارنالعان كەڭەسكە قاتىستى. كەڭەستى وبلىس اكىمى قۇمار اقساقالوۆ جۇرگىزىپ وتىردى.
«ناتيجەلى جۇمىسپەن قامتۋدى جانە كاسىپكەرلىكتى جاپپاي دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى» شەڭبەرىندە ۇكىمەت جۇمىس كۇشى ارتىق وڭىرلەردەن سولتۇستىككە قونىس اۋدارۋدى ىنتالاندىراتىن ىقپالدى شارالار جاساپ وتىر. بۇل جۇمىستىڭ قازىرگى ناتيجەسى تۋرالى سەناتورلارعا وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى الماز قوشمانوۆ باياندادى. باعدارلاما باستالعاننان بەرى ەكى مىڭعا جۋىق وتباسى سولتۇستىككە قونىس اۋدارعانى ايتىلدى. باسقارما باسشىسى قونىس اۋدارۋشىلاردى ورنالاستىرۋ جۇمىستارىنا قاناعاتتانارلىق باعا بەردى. جالپى, «ەڭبەك» مەملەكەتتىك باعدارلاماسىنىڭ مەرزىمى وسى جىلدىڭ اياعىندا اياقتالادى. ودان كەيىن, قونىس اۋدارۋ شاراسى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى شەڭبەرىندە ىسكە اسىرىلاتىن بولادى. ءوزىنىڭ سوزىندە ء«وڭىر» دەپۋتاتتىق توبىنىڭ باسشىسى ەرىك سۇلتانوۆ بۇل جوباعا «وڭىرارالىق ەڭبەك ۇتقىرلىعى» شەڭبەرىندە قونىس اۋدارۋشىلار سانى جانە قازاقستان رەسپۋبليكاسىنا قونىس اۋدارعان وتانداستار (قانداستار) سانى – دەگەن ءىس-شارالار ەنگىزىلگەنىن ايتتى. سونىمەن قاتار ۇكىمەتكە كۆوتا سانىن ۇلعايتۋ, اۋىلشارۋاشىلىق ماقساتىندا پايدالانۋعا ارنالعان جەر تەلىمدەرىن ءبولۋ, نەسيەسى بار ازاماتتارعا كانيكۋل بەرۋ, مەكتەپ قۇرىلىسىن وڭتايلاندىرۋ ماسەلەلەرىن قاراستىرۋ ۇسىنىلعانىن ايتتى. سونىمەن بىرگە ول قاراشا ايىنىڭ سوڭىنا جوسپارلانعان ء«وڭىر» دەپۋتاتتىق توبىنىڭ قورىتىندى وتىرىسىندا مەملەكەتتىك جانە جەرگىلىكتى ورگاندارعا وسى ماسەلەگە بايلانىستى باسقا دا ۇسىنىمدار جولداناتىنىن جەتكىزدى.
سەناتور ءالىمجان قۇرتاەۆ وبلىسقا 27 مىڭعا جۋىق قونىس اۋدارۋشىنىڭ وتە از ەكەنىن تىلگە تيەك ەتتى. ء«بىزدىڭ ەسەبىمىزشە بۇل كورسەتكىش وتە از. وسى ۋاقىتقا دەيىنگى اتقارىلعان جۇمىستى سارالاي كەلە, كۆوتا سانىن 5-6 ەسەگە ارتتىرۋ قاجەتتىگى ايقىن», دەدى ول ءوزىنىڭ سوزىندە. سونىمەن قاتار ول ستاتيستيكا دەرەكتەرىنە سۇيەنگەندە سولتۇستىك قازاقستان وبلىسى قابىلداۋشى ايماق رەتىندە كوشىپ كەلۋشىلەردى ەڭ كوپ قابىلداعان وبلىس دەپ اتاي وتىرىپ, سولتۇستىك قازاقستان وبلىسىنىڭ اتقارىلعان جۇمىستارىن باسقا قابىلداۋشى ايماقتارعا مودەلدىك ايماق رەتىندە كورسەتىپ, ونىڭ وڭ تاجىريبەسىن وسى يگى ىستە پايدالانۋعا ءتيىس دەپ بىلەتىنىن جەتكىزدى.
ال دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ سولتۇستىك قازاقستاندا «اسار» ادىسىمەن شەتەلدەن كەلەتىن قازاقتارعا تۇرعىن ۇيلەر سالۋ ماسەلەسى تۋرالى ايتتى. دۇنيەجۇزى قازاقتارى قاۋىمداستىعىنىڭ توراعاسى ن.نازارباەۆتىڭ شەتەلدەردەگى قازاقتاردى تاريحي وتانىنا اكەلۋ, قازاقستاندىقتاردىڭ الەۋمەتتىك قورعالماعان ساناتتارىنىڭ تۇرعىن ءۇي ماسەلەلەرىن شەشۋ جانە جاڭا جۇمىس ورىندارىن اشۋ تۋرالى تاپسىرماسى اياسىندا قولعا الىنعان بۇل جوسپار اقمولا مەن تۇركىستان وبلىستارىندا ىسكە اسىپ جاتىر. سونداي ادىسپەن كوتتەدجدىك اگروقالاشىقتار سالۋ ەندى سولتۇستىك قازاقستان وبلىسىندا ىسكە اسىرىلماقشى. وعان 180 گەكتارداي جەر ءبولىنۋ جوسپارلاندى.
سەناتورلاردىڭ قونىس اۋدارۋشىلاردى قولداپ, ولاردىڭ ورنالاسۋىن باقىلاۋدا ۇستاپ وتىرعاندارىنا ريزا بولاسىڭ. ۇكىمەت تە بۇل ىسكە قاجەتتى قارجىنى ءبولىپ وتىر. تەك بۇل ىستە اتتەگەن-اي دەيتىن ءبىر-اق ماسەلە بار. ول – سالىنعان ۇيلەردىڭ سولتۇستىكتىڭ سۋىعىنا توتەپ بەرە المايتىن ساپاسىزدىعى. سىرتى قانشا ادەمى بولسا دا كوپتەگەن ءۇيدىڭ سۋىعى, ساپالى سالىنباعان سوڭ قانشا وت جاقسا دا جىلىنبايتىندىعى قونىس اۋدارۋشى اعايىننىڭ قاباعىنا كىربىڭ تۇسىرەدى. سەناتورلار وسى ماسەلەگە نازار اۋدارىپ, سالىنعان ۇيلەردى قابىلداعان كوميسسيالاردىڭ جۇمىسىنا باعا بەرۋدە ىجداعاتتىلىق كەرەكتىگىن تالاپ ەتكەندە – ولاردىڭ قولداۋىنا حالىق ءتىپتى ىرزا بولار ەدى. سونىمەن بىرگە ادەيى كەلگەن سوڭ, تىم بولماسا وبلىس ورتالىعىنىڭ ماڭىنداعى ءبىر-ەكى اۋىلعا بارىپ, قونىس اۋدارۋشىلار ۇيلەرىنىڭ ساپاسىن ءوز كوزدەرىمەن كورگەندەرى نۇر ۇستىنە نۇر بولار ەدى. الايدا سەناتورلار ەرتەسىنە تەك پەتروپاۆل قالاسىندا سالىنىپ جاتقان قۇرىلىستاردى كورىپ, تۇستەن كەيىن استاناعا اتتانىپ كەتتى.
قونىس اۋدارۋشىلاردىڭ جالپى ماسەلەسى ونسىز دا بەلگىلى بولاتىن, ولارعا كۆوتانى ارتتىرۋ, قاراجات ءبولدىرۋ ماسەلەلەرى استانادا وتىرىپ-اق شەشىلەدى ەمەس پە. ال بۇل جەردە دەپۋتاتتاردىڭ قونىس اۋدارۋشىلاردىڭ وزدەرىمەن كەزدەسكەنى, ماسەلەلەرىن ءوز كوزدەرىمەن كورگەندەرى ەكى جاققا دا ءتيىمدى بولار ەدى. وكىنىشكە قاراي, سەناتورلار ولارمەن كەزدەسۋدى جوسپارلاماعان كورىنەدى.
پەتروپاۆل