وسى كۇندەرى ۇلتتىق ساناقتىڭ سوڭعى اپتالارى وتۋدە. جامان ىندەتتىڭ كەسىرىنەن جانە باسقا دا سەبەپتەرگە بايلانىستى بۇل ماڭىزدى شاراعا ءتۇرلى كەدەرگى كەزدەسەدى.
ءبىر اپتا بۇرىن وبلىس اكىمى قۇمار اقساقالوۆ وبلىس تۇرعىندارىنا ارنايى ۇندەۋ جاريالاپ, ساياسي ماڭىزى زور مەملەكەتتىك شاراعا بەلسەندىلىكپەن قاتىسۋدى ءوتىندى. جۋىردا وبلىس اكىمىنىڭ ورىنباسارى عاني نىعىمەتوۆ پەن وبلىستىق ستاتيستيكا دەپارتامەنتىنىڭ باسشىسى مارال نۇرجاۋىپوۆا جۋرناليستەرگە بريفينگ بەرىپ, ساناقتىڭ ارالىق قورىتىندالارى تۋرالى بايانداپ بەردى. الدىمەن 10 جىلدا ءبىر رەت وتكىزىلەتىن ۇلتتىق ساناقتىڭ ماڭىزدىلىعى تۋرالى سويلەگەن عاني ساقتاعان ۇلى بۇل ءىس-شارا ەكونوميكا مەن ساياساتتا ستراتەگيالىق بولجامدار مەن جوسپارلار قۇرۋ, حالىق سانىنىڭ وزگەرۋ بارىسىن ساراپتاۋ ءۇشىن اسا قاجەت ەكەنىن جەتكىزدى. بۇگىنگى تاڭعا دەيىن سولتۇستىكقازاقستاندىقتاردىڭ 90 پايىزى ساناقتان وتكەن ەكەن. 8 قاراشاعا دەيىن سوزىلاتىن قالعان كۇندەردە تۇرعىنداردىڭ ساناقتان تولىق ءوتۋ قاجەتتىگى ايتىلدى.
م.نۇرجاۋىپوۆا وبلىس اۋداندارى اراسىنان بۇگىنگە دەيىن ساناقتى اياقتاۋعا ەسىل, قىزىلجار جانە اققايىڭ اۋداندارى جاقىن ەكەنىن ايتتى. بۇلاردىڭ كورسەتكىشتەرى 98%-عا جەتكەن. «ونلاين ساناققا ەڭ بەلسەندى قاتىسقان اقجار, مامليۋت جانە ءۋاليحانوۆ اۋداندارى. ال اققايىڭ, قىزىلجار جانە ەسىل اۋداندارى تۇرعىندارىنىڭ 65-68%-ى ءداستۇرلى فورماتتى تاڭدادى. ونلاين ساناقتان ءوتۋ مۇمكىندىگى 1 قىركۇيەك پەن 15 قازان ارالىعىندا ۇسىنىلعان بولاتىن. بىراق تۇرعىنداردىڭ كوپتەگەن وتىنىشىنە بايلانىستى جانە ساناقپەن حالىقتى قامتۋ كولەمىن ۇلعايتۋ ماقساتىندا ونلاين ساناق وسى جىلدىڭ 1 قاراشاسىنا دەيىن ۇزارتىلدى. وبلىستىڭ ءاربىر تۇرعىنى ساناقتان sanaq.gov.kz
سايتىندا وتە الادى», دەدى ستاتيستيكا دەپارتامەنتىنىڭ باسشىسى.
وبلىستا ءۇي-ءۇيدى ارالاۋ 1 قازاندا باستالعان. بىراق, وكىنىشكە قاراي, كەيبىر تۇرعىندار حالىققا قىزمەت كورسەتۋ ورتالىعىندا بارلىق اقپارات بار دەپ, ەسىك اشۋدان, سۇراققا جاۋاپ بەرۋدەن باس تارتقان. «الايدا ءاربىر ادام بويىنشا مەملەكەتتىك ورگانداردىڭ بارلىق اقپاراتى قۇپيا ەكەنىن اتاپ وتكىم كەلەدى, ونى ەشكىم بۇزا المايدى. ەشقانداي اقپاراتتىق جۇيەدە ازاماتتاردىڭ ءدىني ۇستانىمى, تىلدەردى ءبىلۋى, كوممۋنيكاتسيالارمەن قامتاماسىز ەتىلۋى تۋرالى دەرەكتەر جانە ت.ب. جوق. اقپاراتتىق جۇيە قانشا دامىسا دا حالىق ساناعىن وتكىزۋ بارىسىندا الىنعان اقپاراتتىڭ تەڭدەسى جوق», دەدى م.نۇرجاۋىپوۆا.
ساناق وتكىزۋ ءادىسناماسىنا سايكەس 8 قاراشاعا دەيىن باقىلاپ ارالاۋ قاراستىرىلعان. ياعني تاعى ءبىر اپتاعا جاقىن ۋاقىت بويى ۇيلەردى ارالاۋ جالعاسادى. ءاربىر قازاقستاندىقتى قامتيتىن ماڭىزدى ءىس-شارانىڭ ابىرويمەن وتكەنى قاجەت.
سولتۇستىك قازاقستان وبلىسى