اقتاۋ قالاسىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ەرلان تۇرالى مەن فيزيكا ءپانىنىڭ مۇعالىمى ليزاۆەتا حاميتوۆا بىرلەسە جاساعان Hydropanel جوباسى اۆتورلىق قۇقىققا يە بولدى. بۇل قوندىرعى – ماڭعىستاۋ وبلىسىنداعى اۋىزسۋ قاجەتتىلىگىن جويۋعا كومەكشى قۇرال.
ول اۋا تەمپەراتۋراسىنىڭ كۇرت وزگەرىسىنەن سۋ جينايدى جانە كۇن پانەلدەرى ارقىلى ەلەكتر ەنەرگياسىن وندىرەدى.
– ءبىزدىڭ قۇرىلعىمىز قولجەتىمدى جابدىقتاردان تۇرادى جانە كۇن ەنەرگياسىن سۋعا بۋلانۋ پروتسەسى ارقىلى اينالدىرادى. اۋا ىلعالدىلىعى مەن تەمپەراتۋرا ارتقان سايىن قۇرىلعى سۋدى كوپ وندىرەدى. سىناق بارىسىندا قۇرىلعىمىزدىڭ سۋدى جيناي الاتىندىعىنا كوز جەتكىزدىك, – دەيدى جوبا جەتەكشىسى ليزاۆەتا حاميتوۆا.
ونىڭ ايتۋىنشا, قولدان جاسالعان قۇرىلعى ءبىر كۇندە جارتى ستاقان سۋعا دەيىن جيناي الادى.
– ازىرگە تەك قۇرىلعىنىڭ ميني-ءپروتوتيپى جاسالدى. ەگەر ونى ناقتى جۇزەگە اسىراتىن بولسا, جوبانىڭ قۇنى 2 ملن تەڭگەنى قۇرايدى جانە كۇنىنە 10 ليتر سۋ جيناۋ مۇمكىندىگى بولادى, – دەيدى جاس زەرتتەۋشى ەرلان تۇرالى.
زەرتتەۋشىلەر جوبانى ەكى جىل بويى جاساقتاپ, تولىقتىرۋلار ەنگىزگەن. ال وتكەن ايدىڭ باسىندا جوبانىڭ اۆتورلىق قۇقىعىن قورعاۋ ماقساتىندا ءوتىنىم بىلدىرگەن.
– بولاشاقتا بۇل قۇرىلعىنى ۇلكەيتىپ جاساقتاپ, ونى مەكتەپ الاڭىنا جانە قالا كوشەلەرىنە قويعىمىز كەلەدى. بۇل كوشەدە شولدەپ كەلە جاتقان تۇرعىندارعا وتە ۇلكەن كومەك بولار ەدى. سول ءۇشىن دە اۆتورلىق قۇقىق كۋالىگىن الدىق. الداعى ۋاقىتتا جوبامىزدى پاتەنتكە دە ۇسىنىپ كورەمىز, – دەيدى زياتكەر وقۋشى.