ەل تاۋەلسىزدىگىنىڭ 30 جىلدىعى قارساڭىندا اۋىلدىڭ اجارىن كورسەتىپ, جالپاق جۇرتتى يگىلىكتى ىستەرگە جۇمىلدىرۋدى مۇرات تۇتقان «اۋىلدىڭ گۇلدەنۋى – قازاقستاننىڭ گۇلدەنۋى» مارافونى – اۋقىمى كەڭ شارا.
بەرەكەسى مول سارىالا كۇزدىڭ شۋاقتى كۇنىندە ارشالى كەنتىنىڭ ورتالىق الاڭىندا ۇيىمداستىرىلعان جارمەڭكەدەن تۇرعىندار ەت جانە ءسۇت ونىمدەرىن, الۋان ءتۇرلى كوكونىس پەن ءدامى ءتىل ۇيىرەتىن بال ءتارىزدى ونىمدەردى بازار باعاسىنان الدەقايدا ارزانعا ساتىپ الدى. وسى ءبىر قادام داستارحاننىڭ بەرەكەسىن قاشىرماۋعا سەپ بولاتىن بولسا, ەكىنشى جاعىنان اۋىلدا تۇرىپ, ەرىنبەي ەڭبەك ەتسەڭ, ءوزىڭ دە وسىنداي يگىلىككە يە بولاسىڭ دەگەن يشارانى اڭعارتىپ تۇرعانداي. التىن بەسىك – اۋىلدىڭ شاڭىراعىن بيىكتەتەتىن دە, بوساعاسىنا قۇت بايلايتىن دا ادال ەڭبەك. تاۋار وندىرۋشىلەر تاباناقى, ماڭداي تەرىمەن وسىرگەن, جيناعان ازىق-ت ۇلىكتەرىن كەنت تۇرعىندارىنىڭ نازارىنا ۇسىنۋى بىرلىك پەن ىنتىماقتاستىقتى ايعاقتاپ تۇرعانداي. بۇيىرعان ءدامدى ءبولىپ جەگەنگە نە جەتسىن. ايتپەسە, ىرگەدەگى نۇر-سۇلتان قالاسىنىڭ ساۋدا سورەلەرىنە جەتكىزسە, تۇتىنۋشىلار پىشاق ۇستىندە تالاسىپ-اق الاتىن دۇنيە.
جارمەڭكەگە «اگروفيرما «پويسك», «نيكولاەۆسكوە» سەرىكتەستىكتەرى مەن «يجەۆسكي» وندىرىستىك كووپەراتيۆى, «بالاشوۆ», «پيتكوۆسكي» شارۋا قوجالىقتارى ءتارىزدى ۇجىمدار قاتىسىپ, سۇرانىسقا يە ازىق-ت ۇلىك تۇرلەرىن ساۋدا سورەلەرىنە ءۇيىپ تاستادى. ءبىر ايتا كەتەرلىگى, ەگدە ادامدارعا جەڭىلدىكتەر دە قاراستىرىلعان.
– مەن قايماعى الىنباعان سۇتتەن جاسالعان سۇزبە, قولدىڭ سارى مايىن ارزان باعاعا ساتىپ الدىم, – دەيدى كەنت تۇرعىنى رايگۇل زاكۋمباەۆا, – ءبىر ىڭعايلىسى, قاجەتتى ازىق-ت ۇلىگىڭدى ىزدەپ, تابانىڭنان تاۋسىلماي, ءبىر جەردەن الاسىڭ. ونىڭ ۇستىنە بازار باعاسىنان الدەقايدا ارزان.
مارافون اياسىندا وڭىردە بىرقاتار ءىس-شارا وتكىزۋ جوسپارلانىپ وتىر. جاستار ءىسى وڭعا باسقان فەرمەرلەرمەن, شارۋاسى شالقىعان شارۋا قوجالىقتارىنىڭ باسشىلارىمەن, ەڭبەگىن ەل ەلەگەن سالا وزاتتارىمەن كەزدەسۋدى جوسپارلاۋدا. ولاردىڭ ءىس-تاجىريبەسى اۋىل شارۋاسىنا ىقىلاسى اۋعان بەلسەندى جاستارعا باعدار بەرۋى ءتيىس. «اۋىل – ەل بەسىگى» الەۋمەتتىك جەلىلەرىندە سۋرەت بايقاۋلارى ۇيىمداستىرىلىپ, ءبىلىم بەرۋ ۇيىمدارىندا اشىق ساباقتار وتكىزىلەدى. تاۋەلسىزدىك جىلدارىنداعى اۋىل شارۋاشىلىعى سالاسىنداعى جەتىستىكتەردى قامتيتىن مازمۇندى فوتوكورمە دە كورەرمەن نازارىنا ۇسىنىلادى. وسىنىڭ بارلىعى اۋىلداعى بەكەم بىرلىك پەن باياندى تىرلىكتىڭ قانشالىقتى باعالى ەكەندىگىن قولمەن قويعانداي ەتىپ كورسەتۋى ءتيىس.
اقمولا وبلىسى,
ارشالى اۋدانى