ۇلىبريتانيانىڭ پرەمەر-ءمينيسترى ۋ.چەرچيلل ءىى دۇنيەجۇزىلىك سوعىس ءجۇرىپ جاتقاندا وزىنە ەلدىڭ جىلدىق بيۋدجەتىنىڭ جوباسىن كورسەتكەن قارجى مينيسترىنەن: «مادەنيەتكە بولىنەتىن قارجى قايدا؟» دەپ سۇراپتى. قارجى ءمينيسترى: «سوعىس ءجۇرىپ جاتقاندا قايداعى مادەنيەت؟» دەگەندە ۇلى ادام: «سوندا ءبىز نە ءۇشىن سوعىسىپ جاتىرمىز؟» دەگەن ەكەن. سول ايتقانداي, قانداي قيىندىقتار كەزىندە دە مادەنيەت توقىراۋعا ءتيىس ەمەس. سونىڭ ءبىر ايعاعىنداي بولىپ م.اۋەزوۆ اتىنداعى ۇلتتىق دراما تەاترى قىزىلجارعا التى كۇندىك گاسترولدىك ساپارمەن كەلىپ, شىنايى ونەرگە سۋساعان حالىقتىڭ ءشولىن قاندىردى. ولار ن.پوگودين اتىنداعى ورىس دراما تەاترىنىڭ ساحناسىندا ونەر كورسەتتى. پاندەميادان قورعانۋ رەجىمىن ساقتاي وتىرىپ, كۇنىنە ەكى سپەكتاكل قويىلدى.
ءبىز اتالعان تەاتر ديرەكتورىنىڭ شىعارماشىلىق جونىندەگى ورىنباسارى, قازاقستاننىڭ ەڭبەك سىڭىرگەن قايراتكەرى جالعاس تولعانبايدى اڭگىمەگە تارتىپ, شاعىن سۇحبات قۇرعان ەدىك.
«بىلتىر مىنا ىندەتتىڭ كەسىرىنەن ەشقايدا شىعا المادىق. بيىل مادەنيەت جانە سپورت مينيسترلىگىنىڭ رۇقساتىمەن الدىمەن كوكشەتاۋ قالاسىندا بولىپ, ەندى, مىنە, قىزىلجار قالاسىندا گاسترولدىك ساپارمەن ءجۇرمىز. مۇندا كەلمەگەنىمىزگە جيىرما جىلعا جۋىقتاعان. بۇدان بۇرىن, 2003 جىلى «قازاقستاننىڭ رەسەيدەگى جىلى» بولعاندا ومبى قالاسىنا بارىپ, جول-جونەكەي وسىندا ءۇش سپەكتاكل قويعانبىز. حالىقتىڭ ىستىق ىقىلاسىنا قاراعاندا, ساحنا ساڭلاقتارىن ساعىنىپ قالعاندارى كورىنىپ تۇر. بۇل جولى تەاترىمىزدىڭ بىرنەشە جانردى قامتىعان ەڭ جاقسى سپەكتاكلدەرىن الىپ كەلدىك. سونىڭ ىشىندە د.يسابەكوۆتىڭ «جاۋجۇرەك», م.جۇماباەۆقا ارنالعان ء«جۇز جىلدىق ماحاببات», ت.نۇرماعانبەتوۆتىڭ «بەس بويداققا ءبىر توي», ا.ءۆولوديننىڭ «قوشتاسقىم كەلمەيدى», ي.ساپاربايدىڭ «سىعان سەرەناداسى» سپەكتاكلدەرى جانە تەاترىمىزدىڭ جاس رەجيسسەرى جۇلدىزبەك جۇمانبايدىڭ قويىلىمىنداعى ابايدىڭ قاراسوزدەرىنە قۇرىلعان «قارا» ينستسەنيروۆكاسى بار. سونىمەن بىرگە ءوزىمىزدىڭ تەاترىمىزدىڭ تالانتتى اكتريسالارى نازگۇل قارابالينا (يدەيا اۆتورى) مەن بايان قاجىنابيەۆا دايىنداعان «تۋعان كۇن» اتتى ءبىر اكتەردىڭ ورىنداۋىمەن قويىلعان مونوسپەكتاكلدى اكەلدىك. ونى س.مۇقانوۆ اتىنداعى قازاق تەاترىندا قويدىق. كۇن سۋىقتاۋ بولسا دا حالىقتىڭ ەلجىرەپ, جۇرەك جىلۋىن سىيلاعانىن كوردىك. سوندىقتان بارلىق كورەرمەنگە, سونىڭ ىشىندە اۋىل-اۋدانداردان ارنايى كەلگەن اعايىنعا, ءبىزدى قۋانا قارسى الىپ, قۇرمەت كورسەتىپ جاتقان وبلىس باسشىلىعىنا, بارلىق ماسەلەمىزدى شەشىپ بەرگەن ورىس جانە قازاق تەاترىنىڭ ديرەكتورلارى سپارتاك رامازانوۆ پەن ءبىرجان جالعاسباەۆقا ايتار العىسىمىز شەكسىز», دەدى ول.
اكەمتەاتر قىزىلجارعا ىندەتكە بايلانىستى ونەرپازدارىنىڭ 60 جاسقا دەيىنگى ورتا بۋىن وكىلدەرىن عانا اكەلگەن ەكەن. سوندىقتان ترۋپپانى قۇراعان الپىسقا جۋىق ادامنىڭ نەگىزگى بولىگى جاستار. ولاردىڭ اراسىندا بەكجان تۇرىس, دۋلىعا اقمولدا, اسىلبەك بورانباي, داريا ءجۇسىپ, شىنار اسقاروۆا, گۇلنار جاقىپوۆا سياقتى ەسىمدەرى ەلگە تانىمال اكتەرلەر بار. سولاردىڭ ىشىندە جەرلەسىمىز كۇنسۇلۋ شاياحمەتوۆا دا بولدى. «تەاتر عانا ەمەس, كينو, راديو, دۋبلياج سياقتى ونەردىڭ بارلىق سالاسىن مەڭگەرگەن, وزىندىك ءۇنى بار جەرلەستەرىڭىزگە حالىقتىڭ ىقىلاسى دا ەرەكشە ەكەنىن كوردىك. ول ساحناعا شىققاندا حالىقتىڭ قۇرمەتى, ۇزاق سوققان شاپالاعى ايرىقشا بولدى. كەشە تۋىپ-وسكەن اۋدانىنىڭ اكىمى دە كەلىپ, حالىق اتىنان ول كىسىگە ارناۋلى سىي-سياپاتىن جاسادى», دەدى جالعاس تولعانباي.
تەاتردىڭ گاسترولدىك ساپارىن باستاپ كەلگەن ديرەكتورى, بەلگىلى ونەر قايراتكەرى ەركىن جۋاسبەك. قىزىلجارلىقتار م.اۋەزوۆ تەاترىمەن قيماي قوشتاسادى. تەك ءۇزىلىس ۇزاققا سوزىلماي, شىنايى دارىندار ءجيى كەلىپ تۇرسا دەگەن تىلەك ايتىلادى.