اقتاۋدا سۋ تۇشىتۋ زاۋىتىنىڭ قۇرىلىسى باستالدى

مەملەكەت باسشىسىنىڭ تاپسىرماسىنا وراي جەرگىلىكتى اتقارۋشى ورگاندار ءوڭىردى اۋىز سۋمەن قامتاماسىز ەتۋ ماسەلەسىمەن اينالىسۋدا. وبلىس اكىمدىگىنە بىرقاتار كاسىپكەرلەر حابارلاسىپ, جەكە ينۆەستيتسيا ەسەبىنەن سۋ تۇشىتۋ زاۋىتىن سالۋعا ۇسىنىس جاسادى.

بۇعان دەيىن وبلىس اكىمى نۇرلان نوعاەۆ سۋ تۇشىتاتىن زاۋىت قۇرىلىسىنا قارجى سالۋعا دايىن ينۆەستوردىڭ تابىلعانىن ايتىپ, اقتاۋ قالاسىنىڭ اكىمىنە جوبانى جەدەلدەتۋدى تاپسىرعان بولاتىن. 50 گا جەردە سىيىمدىلىعى 40 مىڭ تەكشە مەتر سۋ باسسەيندەرى مەن سۋدى تۇشىتاتىن قوندىرعىلار بوي كوتەرەدى. ينۆەستيتسيالىق جوبانىڭ قۇنى 4 ملرد تەڭگە.

«جۋىردا پرەزيدەنتتىڭ ماڭعىستاۋ وبلىسىنا كەلگەن ساپارى بارىسىندا سۋ ماسەلەسىن شەشۋ تۋرالى تاپسىرما بەرگەن بولاتىن. حالىقتى ۇزدىكسىز اۋىز سۋمەن قامتۋعا باعىتتالعان جوبالاردى جەدەلدەتۋگە كىرىستىك. سۋ تۇشىتاتىن زاۋىت سالۋعا كەلىسكەن ينۆەستورمەن قاجەتتى كەلىسىمدەر جاسالدى», دەدى اقتاۋ قالاسىنىڭ اكىمى نۇرداۋلەت قيلىباي.

جاڭا زاۋىتتىڭ جوسپارلانعان قۋاتى 20 مىڭ تەكشە مەتردەن استام. 2022 جىلى ىسكە قوسىلاتىن جوبانىڭ العاشقى كەزەڭىندە تاۋلىگىنە 5 مىڭ تەكشە مەتر سۋ وندىرىلمەك.

«تەحنيكالارىمىز جەتكىلىكتى. كانال قازۋ جۇمىستارىن باستاپ كەتتىك. قاجەتتى قۇرىلعىلارعا تاپسىرىس بەرىپ جاتىرمىز. ءبىر بولىگى اقش, ەۆروپا ەلدەرىنەن, ەندى ءبىر بولىگى يراننان جەتكىزىلەدى», دەدى جوبا قۇرىلتايشىسى ەسمان جۇماباەۆ.