قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى ەرلان الىمباەۆ ەۋروپالىق ەلدەردىڭ قازاقستانعا جاڭادان تاعايىندالعان ەلشىلەرى – البانيادان كاستريوت روبو, يرلانديادان برايان ماكەلدافف, نورۆەگيادان دجون ميكال كۆيستاد پەن شۆەيتساريادان دەۆيد گريحتينگتەن سەنىم گراموتالارىنىڭ كوشىرمەلەرىن قابىلدادى, دەپ جازادى Egemen.kz.
راسىمنەن كەيىن ە.الىمباەۆ جاڭادان تاعايىندالعان ەلشىلەرمەن جەكە كەزدەسۋ وتكىزدى.
ەلشى ك.روبومەن كەزدەسۋ قورىتىندىسى بويىنشا تاراپتار قازاقستان مەن البانيا اراسىنداعى نەگىزگى قۇجاتتار – ساۋدا-ەكونوميكالىق ىنتىماقتاستىق, قوسارلانعان سالىق سالۋدى بولدىرماۋ, قۇقىقتىق كومەك كورسەتۋ جانە ۆيزاسىز رەجيم تۋرالى كەلىسىمدەرگە قول قويۋ ماسەلەسىن جەدەلدەتۋگە ۋاعدالاستى.
ەلشى ب.ماكەلداففپەن سۇحبات بارىسىندا 2022 جىلدىڭ باسىندا ەكى ەلدىڭ ديپلوماتيالىق قارىم-قاتىناسىنىڭ 30 جىلدىعى مەرەيتويىنا ارنالعان بىرقاتار مادەني ءىس-شارا وتكىزۋگە كەلىستى. قازاقستاننىڭ AIFC جانە يرلانديانىڭ IFSC اراسىنداعى قارجىلىق ىنتىماقتاستىق ماسەلەلەرى تالقىلاندى. تاراپتار پاندەميادان كەيىنگى ءوزارا ءتۋريزمدى دامىتۋ ماڭىزدىلىعىنا باسا نازار اۋداردى.
ەلشى دج.كۆيستادپەن قازاقستان - نورۆەگيا قارىم-قاتىناستارىن دامىتۋ ماسەلەلەرىن تالقىلاۋ اياسىندا تاراپتار پارلامەنتارالىق جانە مادەني ديالوگتى نىعايتۋ جونىندەگى جۇمىستى جالعاستىرۋعا كەلىستى. وسلونىڭ اۋعانستانعا گۋمانيتارلىق كومەك كورسەتۋدەگى ماڭىزدى ءرولىن ەسكەرە وتىرىپ, نورۆەگيالىق تاراپ KazAID-پەن ىنتىماقتاستىقتى جولعا قويۋعا, ونىڭ ىشىندە قر اۋماعىندا «گۋمانيتارلىق حاب» جوباسىن ىسكە اسىرۋعا قىزىعۋشىلىق ءبىلدىردى.
ەلشى د.گريحتينگپەن كەلىسسوزدەر بارىسىندا تاراپتار قر پرەزيدەنتى ق.توقاەۆتىڭ دۇنيەجۇزىلىك ساۋدا ۇيىمىنىڭ 12-ءشى مينيسترلەر كونفەرەنتسياسى جۇمىسىنا قاتىسۋ جانە شۆەيتساريا پرەزيدەنتى گ.پارمەلانمەن كەلىسسوزدەر وتكىزۋ ءۇشىن وسى ەلگە جوسپارلانعان ساپارىنىڭ ماڭىزدىلىعىن راستادى.
«جالپى, سۇحباتتاستار ەكىجاقتى قارىم-قاتىناستاردىڭ بارلىق سالالارىنداعى ىنتىماقتاستىقتى ودان ءارى دامىتۋعا مۇددەلىلىگىن ءبىلدىردى», دەپ جازادى قر ءسىم ءباسپاسوز قىزمەتى.