حالىق اققۋدى كيەلى قۇس ساناپ, ولتىرۋگە قيمايدى. قازاق قوعامىندا اققۋدى اتۋ اۋىر قىلماس, ءتىپتى جانتۇرشىگەرلىك وقيعا سانالعان.
اققۋدىڭ تازا, تاكاپپار سۇلۋ قالىبى عانا ەمەس سىڭارىنا ەشقاشان اينىمايتىن بەرىكتىگى دە ماحابباتتىڭ سيمۆولى ىسپەتتەس بولىپ, بۇرىن-سوڭعى اقىنداردىڭ بارىنە شابىت تۋدىرعان... وسى ورايدا بيىل عانا كولگە قاپتاعان بالدىرلاردى كيەلى اققۋ قۇستىڭ تۇمسىعىمەن سىرتقا شىعارىپ جۇرگەن «تازالىق قىزمەتى» دە تالاي ادامدى ءتانتى ەتكەنى ەسكە تۇسەدى. بۇل كورىنىس الەۋمەتتىك جەلىلەردە كەڭىنەن تارالعان-دى.
اققۋدىڭ تازالىعى سونداي, ماڭىنا قاز-ۇيرەكتەردى دە جولاتپاي, قۋىپ تاستايدى. وسىنداي قاسيەتتەرىنىڭ ءبارى حالىق اراسىندا ونى ايرىقشا قۇسقا تەڭەيتىن اڭىزدار مەن ەرتەگىلەر تۋعىزعان. ونىڭ القىمى قىزىل كەلەتىن ەرەكشە سۇڭقىلدايتىن ءبىر ءتۇرى «قىزىل كىتاپقا» دا ەنگىزىلگەن.
مىنە, وسىنداي عاجاپ قۇستى جۋىردا سولتۇستىكقازاقستاندىق ءبىر سۋىققول اشقاراق اتىپ الىپ, قىل تاماعىنان وتكىزبەك بولىپتى. اققۋ اڭشىدان قورىقپايدى, ادامدار ءوزىن قورعايتىنىن سەزەتىن بولسا كەرەك, ول كولدىڭ جاعاسىنا دەيىن كەلىپ, ەمىن-ەركىن ءجۇزىپ-جىلجىپ جۇرەدى. سونى پايدالانعان اڭشىسىماق اسىل قۇستى اتىپ ءولتىرىپتى.
وقيعا ايىرتاۋ اۋدانىنىڭ اۋماعىندا بولعان. جەرگىلىكتى پوليتسيا مەن قورىقشىلار بىرلەسە رەيد اتقارىپ جۇرگەندە ورماننىڭ باۋىرىنان سۇڭقىلداق اققۋدىڭ قالدىقتارىن تاپقان. وسى جەردە قىسقا وتىن دايىنداۋ بريگاداسى ەڭبەك ەتىپ جاتقان. وقيعا ورنىنا كەلگەن جەدەل-تەرگەۋ بريگاداسى جۇمىسشىلاردىڭ ءبىرىنىڭ «قىزىل كىتاپقا» ەنگەن قۇستى اتۋعا قاتىسى بار ەكەندىگىن انىقتادى. انىقتالعان ازامات ع.مۇسىرەپوۆ اۋدانىنىڭ 32 جاستاعى تۇرعىنى بولىپ شىقتى. ونىڭ تۇرعىلىقتى مەكەنىن تەكسەرۋ بارىسىندا اققۋدىڭ قالدىقتارى, دارا ۇڭعىلى 16 كاليبرلى «يج-18» مىلتىعى, اتىلعان گيلزا مەن وقتالعان پاترون تابىلعان. قازىر اتالعان فاكتى بويىنشا قىلمىستىق كودەكستىڭ 337-بابى بويىنشا قىلىستىق ءىس قوزعالدى. بۇل باپ جانۋارلاردىڭ سيرەك كەزدەسەتىن جانە قۇرىپ كەتۋ قاۋپى تونگەن تۇرلەرىنە, سونداي-اق پايدالانۋعا تىيىم سالىنعان جانۋارلارعا قاتىستى «زاڭسىز اڭشىلىق» دەگەن جاۋاپكەرشىلىكتى كوزدەيدى.
«بۇگىنگى تاڭدا وبلىستا ەكولوگيالىق قىلمىس سالاسىنداعى 17 قىلمىستىق ءىس تىركەلدى, 414 اڭ اۋلاۋ قاعيدالارىن بۇزۋ جانە 273 بالىق اۋلاۋ قاعيدالارىن بۇزۋشىلىق انىقتالدى», دەيدى جەرگىلىكتى پوليتسيا قىزمەتى باسقارماسىنىڭ باستىعى, پوليتسيا پودپولكوۆنيگى ايدىن بايماتوۆ.