ەلورداداعى بوتانيكالىق باقتا دۋاتلون سايىسى ءوتىپ جاتىر

ۇشقىنداپ جاۋعان قارعا قاراماستان, ەلوردانىڭ بوتانيكالىق باعىنا جينالعان دۋاتلون جانكۇيەرلەرى اۋەسقويلار اراسىنداعى قالالىق جارىستى تاماشالاۋدا. سولاردىڭ اراسىندا قر پرمەر-ءمينيسترىنىڭ ورىنباسارى ەرالى توعجانوۆ تا بولىپ, سايىستى اشتى.

«وسىنداي كۇن رايىنا قاراماي, جارىسقا كەلگەن اۋەسقوي سپورتشىلارعا, ولاردى قولداۋ ءۇشىن جينالعان جانكۇيەرلەرگە العىس ايتامىن», دەدى ۆيتسە-پرەمەر.

جارىستى ۇيىمداستىرۋشىلاردىڭ سوزىنە قاراعاندا, بۇل شارا اشىق اسپان استىنداعى ترياتلون ماۋسىمىن تۇيىندەيتىن سايىس بولماق.

«بۇگىنگى دۋاتلون جارىسىنا 150 ادام قاتىسىپ جاتىر. ولار جاسى بويىنشا 18-29, 30-39, 40-49 جانە 50-دەن جوعارى دەپ ءتورت ساناتقا جىكتەلگەن. سونداي-اق, ايەلدەر مەن ەرلەر بولەك-بولەك سىنعا ءتۇسىپ جاتىر. دۋاتلوننىڭ ءبىرىنشى كەزەڭىندە 5 شاقىرىمعا جۇگىرەدى. ودان كەيىن ۆەلوسيپەدكە ءمىنىپ, 20 شاقىرىمدى ەڭسەرىپ, قايتا 2,5 شاقىرىم جۇگىرەدى. بۇل جارىس اشىق اسپان استىنداعى ترياتلون ماۋسىمىن قورىتىندىلايتىن جارىس دەسە دە بولادى. جارىس جۇلدەگەرلەرىنە سپورت جاراقتارى سىيعا بەرىلەدى. ونىڭ ۇستىنە مەدالدەر تابىستالادى. جارىسقا كىلەڭ اۋەسقويلار قاتىسپى جاتىر», دەدى نۇر-سۇلتان قالاسىنىڭ ترياتلون فەدەراتسياسىنىڭ باس حاتشىسى ارمان باجەنوۆ.