قازاقستاندا جالعىزباستى زەينەتكەرلەرگە عانا ەمەس, سونداي-اق جاقىن تۋىستارىنىڭ كومەگىنسىز قالعان, وتباسى ىشىندەگى جانجالعا بايلانىستى قيىن جاعدايدا جۇرگەن قارت ادامدارعا دا ارناۋلى الەۋمەتتىك قىزمەتتەر ەندى ۇيدە كورسەتىلەتىن بولادى.
ءتيىستى وزگەرىستەر «ارناۋلى الەۋمەتتىك قىزمەتتەر كورسەتەتىن ۇيىمدار قىزمەتىنىڭ قاعيدالارىن بەكىتۋ تۋرالى» قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترىنىڭ 2018 جىلعى 29 تامىزداعى №379 بۇيرىعىنا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعىندا كوزدەلگەن.
جوعارىدا اتالعان نورمانى بالا قۇقىقتارى جونىندەگى ۋاكىل ارۋجان ساين, پارلامەنت ءماجىلىسىنىڭ دەپۋتاتتارى, بەلگىلى قوعام قايراتكەرلەرى, ۇەۇ جانە جاو وكىلدەرى ۇسىندى.
سونداي-اق بارلىق مەديتسينالىق-الەۋمەتتىك مەكەمەلەردە بەينەباقىلاۋ كامەرالارىن مىندەتتى تۇردە ورناتۋدى قاراستىراتىن وزگەرىستەر ەنگىزىلدى. كامەرالار ۇيىمعا ىرگەلەس جاتقان اۋماقتىڭ الاڭى بويىنشا, نەگىزگى جانە قوسالقى كىرەبەرىستەردىڭ جانىندا, سونداي-اق ءۇي-جايلار مەن ورتاق پايدالانىلاتىن كابينەتتەردە ورناتىلادى. ءمام-دەگى تۋىستارى مەن جاقىن ادامدارىنىڭ جازبالاردى كورۋگە رۇقساتى بولادى.
بۇدان باسقا, قۇجات قاجەت بولعان جاعدايدا مەديتسينالىق-الەۋمەتتىك مەكەمەلەردە تۇراتىن بارلىق ادامداردىڭ ينتەرنەتكە قول جەتكىزۋىن قامتاماسىز ەتۋدى رەتتەيدى.
ايتا كەتۋ كەرەك, حالىقتى الەۋمەتتىك قورعاۋ جۇيەسىندە 23 مىڭنان استام ادامدى قامتيتىن ستاتسيونارلىق ۇلگىدەگى 113 ءمام جۇمىس ىستەيدى.
سونىمەن قاتار قاجەت بولعان جاعدايدا قار, كۇل شىعارۋ, كومىردى قازاندىقتارعا جەتكىزۋ جانە باسقا دا ماۋسىمدىق جۇمىستاردى ورىنداۋ ماقساتىندا «تراكتور» پوزيتسياسىن قوسا وتىرىپ, ستاتسيونارلىق ۇلگىدەگى ءمام اۆتوكولىك قۇرالدارىنىڭ ءليميتىن كەڭەيتۋ كوزدەلەدى. بۇل كولىك قۇرالىنىڭ بولۋى اۋىلدىق ەلدى مەكەندەردە ورنالاسقان ءمام ءۇشىن قاجەت.
جوعارىدا اتالعان سالالىق بۇيرىق جەرگىلىكتى اتقارۋشى ورگاندار مەن قوعامدىق بىرلەستىكتەردەن ارناۋلى الەۋمەتتىك قىزمەتتەر كورسەتۋ سالاسىنداعى نقا-عا وزگەرىستەر ەنگىزۋ بويىنشا 150-گە جۋىق ۇسىنىس جينالىپ, تالدانعاننان كەيىن ازىرلەنگەنىن ايتا كەتەيىك.