قر پرەمەر-ءمينيسترىنىڭ ورىنباسارى ەرالى توعجانوۆ قر ۇكىمەتىنىڭ ءباسپاسوز ورتالىعىندا مەملەكەت باسشىسىنىڭ قازاقستان حالقىنا جولداۋىن ىسكە اسىرۋ شارالارى جونىندەگى بريفينگتە الەۋمەتتىك قورعاۋ ماسەلەلەرى تۋرالى ايتتى, دەپ جازادى Egemen.kz.
ەرالى توعجانوۆتىڭ ايتۋىنشا, بىلىكتىلىكتەردى رەتتەۋ - ەڭبەك نارىعىنداعى بارلىق قارىم-قاتىناستى وزگەرتەتىن تۇبەگەيلى جانە جۇيەلى قادام.
«كوپتەگەن ەلدە جۇمىس ورىندارىنا, قىزمەتكەرلەردىڭ بىلىكتىلىك دەڭگەيىنە قويىلاتىن تالاپتاردى بەلگىلەۋ ارقىلى تەحنولوگيالىق سەرپىلىس جاسالدى. وڭتۇستىك كورەيانىڭ تاجىريبەسى 1973 جىلى «ۇلتتىق تەحنيكالىق بىلىكتىلىك جۇيەسى تۋرالى» زاڭنىڭ قابىلدانۋى ناتيجەسىندە ءجىو-ءنىڭ 100 ەسەدەن استام وسكەنىن كورسەتەدى. وسىعان ۇقساس, قازاقستاندا «كاسىبي بىلىكتىلىك تۋرالى» زاڭ ازىرلەنەتىن بولادى», دەدى ول.
العاش رەت ەڭبەك نارىعىنا ارنالعان 589 كاسىپتىك ستاندارت ازىرلەنىپ, قولدانىلىپ جاتىر. سونداي-اق, كەز كەلگەن كاسىبي وقۋدان, بەيرەسمي, تاۋەلسىز وقىتۋدان كەيىن بىلىكتىلىكتى راستاۋعا بولادى جانە مۇنداي بىلىكتىلىكتى جۇمىس بەرۋشىلەر مويىندايدى.
پرەمەر-ءمينيستردىڭ ورىنباسارى تسيفرلاندىرۋ جۇمىسپەن قامتۋدىڭ جاڭا نىساندارىنىڭ پايدا بولۋىنا الىپ كەلگەنىن اتاپ ءوتتى. ناقتى مىسالدارى — Uber, ياندەكس-تاكسي پلاتفورمالارىندا جۇمىس ىستەيتىن جۇرگىزۋشىلەر, Wolt كۋرەرلەرى جانە ت. ب.
«بۇگىندە الەمنىڭ كوپتەگەن ەلىندەگى, سونىڭ ىشىندە قازاقستانداعى ينتەرنەت-پلاتفورمالار نەگىزىندە جۇمىسپەن قامتۋ زاڭنامالىق تۇرعىدان جەتكىلىكتى تۇردە رەتتەلمەگەن. سوندىقتان بيىل الەۋمەتتىك, مەديتسينالىق ساقتاندىرۋ, زەينەتاقىمەن قامتاماسىز ەتۋ جانە سالىق سالۋ ماسەلەلەرىن قوسا العاندا, جۇمىسپەن قامتۋدىڭ جاڭا فورمالارىن رەتتەۋ تەتىگى ازىرلەنەتىن بولادى», دەپ حابارلادى ە. توعجانوۆ.