رەسەيدە مۇعالىم مەن ءتارتىپ ساقشىسىن اتىپ ولتىرگەن وقۋشى ءومىر بويىنا باس بوستاندىعىنان ايىرىلۋى مۇمكىن دەپ حابارلايدى 24.kz.
رەسەي قۇقىق قورعاۋشىلارى ماسكەۋدەگى №263 مەكتەپتىڭ وقۋشىلارىن تۇتقىنعا العان كۇدىكتىنىڭ تۇلعاسىن انىقتادى. ول جوعارعى سىنىپ وقۋشىسى سەرگەي گوردەەۆ بولىپ شىقتى.
تەرگەۋ كوميتەتىنىڭ اتاپ وتكەنىندەي, س.گوردەەۆ مەكتەپ كۇزەتشىسىن قارۋمەن قورقىتىپ, ءبىلىم وشاعىنا باسىپ كىرگەن. ارتىنان ول جوعارى سىنىپ وقۋشىلارى وتىرعان بولمەگە كىرىپ, گەوگرافيا ءپانىنىڭ مۇعالىمىن اتىپ ءولتىردى. بۇل جەتكىنشەك وقيعا ورنىنا كەلىپ جەتكەن ءتارتىپ ساقشىلارىنا دا وق اتقان. سول كەزدە ءبىر پوليتسەي مەرت بولىپ, تاعى بىرەۋى جاراقات العان.
الدىن الا اقپارات بويىنشا, س.گوردەەۆ بۇعان دەيىن دە ۇستازىمەن جانجالداسىپ قالعان كورىنەدى. جيىرمادان استام وقۋشىنى تۇتقىندا ۇستاپ وتىرعان ايىپكەردى پوليتسياعا بەرىلۋگە ونىڭ اكەسى كوندىرگەن. ول ءتارتىپ ساقشىلارىمەن بىرگە كەلىسسوزدەر جۇرگىزگەن بولاتىن.
قازىر ۇستالعان كۇدىكتىگە قاتىستى قىلمىستىق ءىس قوزعالىپ,تەرگەۋ امالدارى جۇرگىزىلۋدە.
ايدار ورىسباەۆ.
دەرەككوز: 24.kz.
فوتو: Vk.com.