ەلوردادا قر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەڭەيتىلگەن ءماجىلىسى ءوتىپ جاتىر, دەپ حابارلايدى Egemen.kz.
«وزدەرىڭىز بىلەتىندەي, قر تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسى اياسىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق جوباسى» ىسكە اسىرىلدى. اتالعان جوبانىڭ ارقاسىندا قازاقستاندىق گۋمانيتارلىق ءبىلىم سالاسى تولىقتاي جاڭارىپ, جاڭا دەڭگەيگە كوتەرىلدى. ءدۇنيجۇزىنىڭ الدىڭعى قاتارلى وقۋ ورىندارىنىڭ ەڭ بەدەلدى عالىمدارى دايىنداعان وقۋ قۇرالدارى قازاق تىلىنە اۋدارىلىپ, ەلىمىزدىڭ بارلىق وقۋ ورىندارىنا جەتتى. الەمنىڭ ەڭ وزىق ۋنيۆەرسيتەتتەرىنىڭ وقۋ مازمۇنى جارتى ميلليوننان اسا قازاقستاندىق ستۋدەنتتىڭ قولىنا ءتيدى. ۋنيۆەرسيتەتتەرىمىزدىڭ وقۋ باعدارلامالارىنا كىردى. بۇل تۇرعىدان «رۋحاني جاڭعىرۋ» باعدارلاماسى مەن «100 جاڭا وقۋلىق» جوباسى «بولاشاق» باعدارلاماسىنىڭ جالعاسى ىسپەتتەس. سونىمەن بىرگە بۇل باستاما قازاق ءتىلىنىڭ جاڭا قوعامىنا ساي جاڭا بىلىممەن 21 عاسىر ازاماتتارىن قاجەتتى اقپاراتپەن تولىقتىردى. ءتىلىمىزدىڭ عىلىمي الەۋەتى ارتتى», دەدى كەڭەيتىلگەن ءماجىلىستى اشقان قر مەملەكەتتىك حاتشىسى قىرىمبەك كوشەرباەۆ.
سونداي-اق ونىڭ ايتۋىنشا, «100 جاڭا وقۋلىق» جوباسىنىڭ ارقاسىندا كاسىبي, اكادەميالىق جانە كوركەم اۋدارماشىلار ورتاسى قالىپتاستى. وزىندىك جۇمىس تەحنولوگياسى, ءستيلى, تەرمينولوگياسى بار اۋدارما مەكتەبى پايدا بولدى. جوباعا قاتىسقان جۇزدەگەن مامان كاسىبي شىڭدالىپ, اۋدارماشى عانا ەمەس ۇستاز, عالىم, زيالى ورتا وكىلى رەتىندە جاڭا قىرىنان تانىلدى.
«وسىنىڭ بارلىعى ءبىز ەل رەتىندە قىسقا عانا ۋاقىتتا قول جەتكىزگەن, بىراق, ءبىزدىڭ رۋحانياتىمىزعا كوپ جىل جەمىسىن بەرەتىن ناقتى جۇمىستىڭ اۋىز تولتىرىپ ايتارلىق ناتيجەسى دەۋگە ابدەن بولادى», دەدى مەملەكەتتىك حاتشى.