بەلگيانىڭ فلاندريا وڭىرىندە ۆەلوسپورتتان (شوسسە) الەم چەمپيوناتىنىڭ جالاۋى جەلبىرەدى. بۇل جارىستا 11 جۇلدە جيىنتىعى ساراپقا سالىنۋدا, دەپ حابارلايدى Egemen.kz.
ايتۋلى جارىستىڭ تۇساۋى سوناۋ 1921 جىلى كەسىلدى. سول كەزدەن بەرى ۇزدىكتەر سايىسىن جەر جاھانداعى كوپتەگەن مەملەكەتتەر قابىلدادى. سوڭعى باسەكە بىلتىر يتاليانىڭ يمولا قالاسىندا ءوتتى. كوروناۆيرۋس دەرتىنىڭ ءورشىپ تۇرۋى سالدارىنان اپەننين تۇبەگىندەگى الەم چەمپيوناتىنا قاتىسۋشىلار نەبارى ءتورت مەدال جيىنتىعى ءۇشىن تالاستى. سول باس جۇلدەنىڭ ەكەۋىن نيدەرلاندتىڭ ماقتانىشى اننا ۆان دەر برەگگەن جەڭىپ السا, قالعان ەكى التىندى فرانتسيالىق جيۋليان الاپفيليپپ پەن يتاليالىق فيليپپو گاننو ولجالادى.
بيىل 100 رەت ۇيىمداستىرىلىپ وتىرعان ءدۇبىرلى دودانىڭ العاشقى مەدالدارى دا ءوز يەلەرىن تاپتى. ەرلەردىڭ 43,3 شاقىرىمدىق سايىسىندا يتاليالىق فيليپپو گاننا الدىنا جان سالماسا, بەلگيانىڭ قوس قىرانى – ۆاۋت ۆان ارت پەن رەمكو ەۆەنەپۋل جۇلدەگەرلەر قاتارىنان كورىندى. قازاقستاندىق ۆەلوشاباندوزدار اراسىندا ەڭ ۇزدىك ناتيجەگە دميتري گرۋزدەۆ قول جەتكىزدى. ول 31-ورىندى قاناعات تۇتتى.
ايەلدەر باسەكەسىندە نيدەرلاندتىق ەللەن ۆان دەيك دارا شىقسا, توپتىق جارىستا دانيالىق يوحان پرايس-پەتەرسەن وزدى.