جۋىردا سولتۇستىك قازاقستان وبلىستىق ونوماستيكالىق كوميسسياسىنىڭ وتىرىسى بولىپ, وندا ۇلتىن قولداپ, قورعاپ, قارا باستارىنا كەلگەن قاۋىپ-قاتەرگە قاراماي كۇرەسكەن الاش ارداقتىلارىنىڭ اتى ۇلىقتالدى. كوميسسيا توراعاسى, وبلىس اكىمىنىڭ ورىنباسارى عاني نىعىمەتوۆ ەلىمىزدە ساناق جۇرگىزىلىپ, نىساندارعا ات بەرۋ نەمەسە اۋىستىرۋ ماسەلەلەرىنىڭ كەيىنگە قالدىرىلعانى تۋرالى شەشىمنىڭ تىيىم سالىنباعان تۇستارى تابىلعانىن ايتتى.
«ساناق جۇرۋىنە بايلانىستى ات بەرۋگە تىيىم سالۋ كوشەلەر مەن ەلدى مەكەندەرگە قاتىستى. ال ءبىلىم بەرۋ مەكەمەلەرى مەن باسقا ورىندارعا ونىڭ قاتىسى جوق. سوندىقتان ءبىز باستاعان ءىسىمىزدى ودان ءارى جالعاستىرىپ, وبلىس ورتالىعىندا ەشكىمنىڭ اتى بەرىلمەگەن ءبىلىم وردالارىنا الاش قايراتكەرلەرىنىڭ ەسىمىن بەرۋ كەرەك دەپ شەشتىك. بارلىق مىندەتتى شارالار وتكىزىلدى. مەكتەپ ۇجىمدارىمەن كەزدەسۋلەر بولىپ, ولاردىڭ كەلىسىمدەرى الىندى», دەدى ول ءوزىنىڭ سوزىندە.
سونىمەن قالانىڭ بەرتىن جاڭعىرتىلعان «بەرەكە» شاعىن اۋدانىنداعى ءۇش قاباتتى №25 مەكتەپكە الاش كوسەمى ءاليحان بوكەيحاننىڭ ەسىمى بەرىلەتىن بولدى. مۇنداعى مۇعالىمدەر ۇجىمى دا ۇسىنىستى قۋانىشپەن قابىلداپ, ءوز تاراپتارىنان دا ءۇن قوسىپ, قازىر ءتۇرلى شارالار دايىنداپ جاتقان كورىنەدى.
ال قالاداعى №9 بايىرعى مەكتەپتەردىڭ بىرىنە ۇلت ۇستازى احمەت بايتۇرسىن ۇلىنىڭ اتى بەرىلەتىن بولدى. بۇل مەكتەپ تە ءۇش قاباتتى, وقۋشىلار سانى 1360, مۇعالىمدەر ۇجىمى 95 ادامنان تۇرادى. ورىسشا ءبىلىم بەرەتىندىكتەن بولسا كەرەك, مۇنداعى كەيبىر ۇجىم مۇشەلەرى احمەت بايتۇرسىنوۆتى بىلمەيمىز دەگەن سوزدەر ايتقان ەكەن. ءتيىستى ءتۇسىندىرۋ شارالارى جۇرگىزىلىپ, احاڭنىڭ ەڭبەكتەرى تۋرالى ايتىلعاننان كەيىن «بىلمەيمىز» دەگەندەردىڭ ءوزى قولدايتىندىقتارىن ايتقان.
ال حالقىمىزدىڭ عاجاپ ۇلدارىنىڭ ءبىرى, قازاق اتىن الەمگە العاش تانىتۋشى, كلاسسيكالىق كۇرەستەن دۇنيە ءجۇزىنىڭ چەمپيونى بولعان كۇش اتاسى قاجىمۇقاننىڭ ەسىمى ۇلتتىق سپورت تۇرلەرى بويىنشا بالالار مەن جاسوسپىرىمدەرگە ارنالعان سپورت مەكتەبىنە بەرىلەتىن بولدى. قازىر بۇل مەكتەپتە سپورتتىڭ 7 ءتۇرى بويىنشا 700 بالا جاتتىعادى. ەندى بۇل بالالار وزدەرىنىڭ قاجىمۇقان اتىمەن بايلانىستىلىعىن ماقتانىشپەن ايتىپ جۇرەتىن بولدى. قاي جەردە, الەمنىڭ قاي تۇكپىرىندە تابىسقا جەتسە دە ولاردىڭ «مەن قاجىمۇقان مەكتەبىنىڭ تۇلەگىمىن» دەپ كۇش اتاسىن الدىمەن اۋىزعا الارى ءسوزسىز.
ال حالقىمىزدىڭ اردا ازاماتتارىنىڭ ءبىرى, ستاليندىك گولوششەكيننىڭ وزىنە قارسى تۇرعان جاسىن تۇلعا سماعۇل سادۋاقاسوۆتىڭ ەسىمى قالانىڭ ەڭ باستى كوشەلەرىنىڭ ءبىرى – ينتەرناتسيونالداعى №2 مەكتەپكە بەرىلەتىن بولدى. ونىڭ ۇجىمى دا سماعۇلدى تانىمايمىز دەگەن ەكەن, ءتيىستى تۇسىنىك بەرۋ جۇمىستارى جۇرگىزىلگەننەن كەيىن ءبارى دە ريزاشىلىعىن ءبىلدىرىپتى. ەندى وسى مەكتەپتىڭ الدىنا سماعۇلدىڭ ەسكەرتكىشى دە ورناتىلماق. سونىمەن قاتار وسى كوشەنىڭ ءوزىن دە س.سادۋاقاسوۆتىڭ اتىنا بەرۋ تۋرالى جوسپار بار. سوندا, كەزىندە ستالين اتىن العان كوشە ەندى سماعۇلدىڭ اتىمەن اتالاتىن بولادى. وسىنىڭ ءوزى حالقىمىزدىڭ رۋحىن كوتەرىپ, ەڭسەمىزدى تىكتەي تۇسۋىمىزگە اسەر ەتەرى ءسوزسىز.
سونىمەن قاتار الاش قوزعالىسى بەلسەندىلەرىنىڭ ءبىرى, ءبىز جۋىردا عانا «ەگەمەنگە» كىتابى شىققانى تۋرالى جازعان العاشقى قازاق دارىگەرلەرىنىڭ قاتارىندا بولعان جۇماعالي تىلەۋليننىڭ ەسىمىن وسىنداعى مەديتسينالىق كوللەدجگە بەرۋ تۋرالى ۇسىنىس تا قارالاتىن بولدى. ول ءۇشىن وسى ۇجىمنىڭ مۇشەلەرىمەن كەزدەسىپ, جۇماعاليدىڭ كىم ەكەنىن تانىستىراتىن توپ قۇرىلدى.
ايتىلعان ۇسىنىستاردىڭ ءبارىن ونوماستيكالىق كوميسسيا مۇشەلەرى ءبىراۋىزدان قولدادى. ەندى بۇل شەشىم ۇكىمەتكە جىبەرىلەدى. ونداعىلار دا قولداپ, ۇلتتىق قانا ەمەس, مەملەكەتتىك مۇددە ءۇشىن جاسالىپ جاتقان ۇلاعاتتى ىستەرگە قولبايلاۋ جاساماسا بولدى. ايتپەسە... جەرگىلىكتى جەردە ءبارى قولداپ, جوعارىعا جىبەرىلگەن تيميريازەۆ اۋدانىن زاڭعار جازۋشى ءسابيت مۇقانوۆتىڭ اتىنا بەرۋ تۋرالى شەشىمدى كولەڭكەسىنەن قورىققان قايسىبىر شەنەۋنىكتەر وتكىزبەي تاستادى. «قازاقتىڭ كەڭ دالاسى اتانعان» ءسابيت مۇقانوۆ سياقتى تۇلعالار بولماسا كەڭەستىك شوۆينيستىك ساياساتتىڭ كەسىرىنەن قازاق اتىنىڭ ءوزى جۇتىلىپ كەتە جازداعانىن قازىرگى باتىرسىنىپ جۇرگەن بىرەۋلەر بىلمەيدى عوي. سوندايلاردىڭ سىنىنان قورىققان شەنەۋنىكتەر قازاقتىڭ بىرنەشە ۇرپاعىنا رۋحاني ءنار بەرىپ كەلە جاتقان جازۋشىنىڭ ەسىمىنە اۋدان اتىن قيمادى. ولارعا سابەڭنەن گورى تيميريازەۆ اتى ماڭىزدىراق بولىپتى...
ال مىنا جاڭا شەشىمدەردى وتكىزۋگە ەشكىم قارسى بولماس دەگەن ۇمىتتەمىز.
سولتۇستىك قازاقستان وبلىسى