سوڭعى جىلدارى وڭىردە جىلىجاي سالىپ, كوكونىس وسىرۋگە دەگەن ۇمتىلىس ۇلعايىپ كەلەدى. ءتيىمدى تۇسى دا تارقاتىپ ايتۋعا لايىق. ماسەلەن, بازار سورەلەرى جەرگىلىكتى ءونىم ەسەبىنەن تولىقتىرىلسا, جەرگىلىكتى جەردە جاڭا جۇمىس ورىندارى اشىلىپ جاتىر.
كاسىپ يەلەرى الدىمەن توپىراق قۇرامىن زەرتتەگەن. كەرەگى دە وسى. قۇنارسىز, ايتاقىر جەردەن تابىس تابۋ استە مۇمكىن ەمەس قوي. ويعا العاندارى ورىندالسا, ودان كەيىنگى شارۋا – دايىن ءونىمدى وتكىزۋ. بۇل ورايدا باس قاتىراتىن ەشتەڭە جوق. تۇتىنۋشىسى مول نۇر-سۇلتان قالاسى ىرگەدە. جىلىجاي سالىنعان ىبىراي التىنسارين اۋىلى استانادان اتشاپتىرىم جەردە.
وڭ-سولىن اقىل تارازىسىنا سالىپ ساراپتاعاننان كەيىن 1 گەكتار جەرگە قىزاناقتىڭ ەكى ءتۇرى ەگىلدى. جىلىجايدىڭ ءونىمى دە جامان ەمەس, بارلىق تەحنولوگيالىق تالاپ مۇلتىكسىز ساقتالعاننان كەيىن قاۋلاپ وسە باستادى. قىلتيىپ جەر بەتىنە شىعىسىمەن-اق كوڭىل ورنىققان. جىلىنا 20 مىڭ توننا ءونىم جيناۋعا تولىق مۇمكىندىك بار. وزدەرىنىڭ مەجەلەپ وتىرعاندارى دا وسى. جىلىجاي ديرەكتورى ابزال ورازىمبەكوۆتىڭ ايتۋىنا قاراعاندا, نۇر-سۇلتان قالاسىنا سىرتتان تاسىمالداناتىن, باعاسى ۋداي كوكونىس كولەمىن شەكتەپ, جەرگىلىكتى ءونىمدى مولىنان ۇسىنۋعا بولادى.
– باستاعان ءىسىمىزدىڭ بەرەكەسى «ەڭبەك» مەملەكەتتىك باعدارلاماسىنىڭ شاراپاتىمەن ءۇيىرىلىپ تۇر, – دەيدى اibol eco product كومپانياسىنىڭ جەتەكشىسى ابزال ورازىمبەكوۆ. – اۋىل شارۋاشىلىعىن قارجىلاي قولداۋ قورىنان 4 ملن تەڭگە نەسيە الدىق. وسىمتالدىعى دالەلدەنگەن, گوللانديا سەلەكتسيونەرلەرىنىڭ تياناقتى تاجىريبەسىنەن وتكىزىلگەن ەكى ءتۇرلى تۇقىم ەكتىك. قازىر جىلىجايدىڭ جالپى اۋماعى 2 مىڭ شارشى مەتر, وندا 6 مىڭ ءتۇپ ورنالاستىرىلدى. الداعى ۋاقىتتا جىلىجاي كولەمىن تاعى دا ەكى گەكتارعا ۇلعايتساق پا دەپ وتىرمىز. كارانتينگە بايلانىستى ازداعان قيىندىق بولعانىمەن, ازىق-ت ۇلىك مولشىلىعىن جاساۋ باعىتىندا جۇمىس ىستەپ جاتىرمىز.
كەشەننىڭ قۇرىلىسى قاڭتار ايىندا باستالعان. جالپى قۇنى 13 ملن تەڭگە توڭىرەگىندە. قولبايلاۋ بولىپ وتىرعان جالعىز جاي – جىلىجايعا قاجەتتى سۋ. مامانداردىڭ ايتۋىنا قاراعاندا, سۋ جەتكىلىكتى بولماسا, قىزاناق تامىرى زاقىمدانباق. جاپىراقتارى السىرەپ, وراتىلىپ قالادى. سول ساتتە جاپىراق تا فوتوسينتەز پروتسەسىن الا الماي, تۇيىندەرگە باعىتتالار كۇش كەميدى. اينالىپ كەلگەندە, بار ەڭبەك زايا بولماسا دا, زيان كوبەيمەك.
ازىرگە سۋدى تاسىمالداپ, كوكونىستەرىن سۋارىپ وتىر. اۋدان اكىمدىگى قاۋىرت ناۋقان – ەگىن وراعى اياقتالعان سوڭ قولۇشىن بەرۋگە ۋادە ەتتى. تىرشىلىك ءنارى تىكەلەي تارتىلسا, جىلىجاي اۋقىمى دا كەڭەيتىلىپ, جاڭا جۇمىس ورىندارى اشىلماق. سول كەزدە جەرگىلىكتى ءونىم كولەمىن كوبەيتۋگە مۇمكىندىك تۋادى.
اقمولا وبلىسى,
تسەلينوگراد اۋدانى