تاريحي تامىرى تەرەڭ, تابيعاتى دا كورىكتى ۇلىتاۋ ءتۋريزمدى دامىتۋعا سۇرانىپ تۇرعانداي ولكە سانالادى. سوعان وراي سوڭعى جىلداردا اۋداندا بۇل سالانى ءورىستەتۋگە باعىتتالعان ءىس-شارالار جان-جاقتى قولعا الىنىپ وتىر. سونىڭ ءبىرى « ۇلىتاۋ-ەل» اتتى تۋريستىك-ساۋىقتىرۋ ورتالىعى قۇرىلىسىنىڭ باستالۋى بولىپ تابىلادى. سول ءۇشىن بولىنگەن 3 گەكتار جەرگە ۇلىتاۋ سەلولىق وكرۋگى شەڭبەرىندە قوسىمشا بەرىلگەن 5 گەكتار بۇرىنعى بوس ورىندا الىس-جاقىننان كەلۋشىلەرگە بارلىق جاعداي جاسالعان ورنالاسۋ, قىزمەت كورسەتۋ ورىندارى بوي كوتەرەدى. مۇندا كونە كۇمبەزدەردى, تاريحي ەسكەرتكىشتەردى ات ءمىنىپ ارالاپ, تاماشالاۋىنا مۇمكىندىك تۋعىزىلادى. سونىمەن بىرگە, وتاندىق جانە شەتەلدىك مەيماندار ۇلتتىق ەجەلگى ونەر ۇلگىلەرىمەن, سالت-ءداستۇر تۇرلەرىمەن تانىسا الادى.
بۇل ىسكە ۇيىتقى بولۋشى اۋداندىق « ۇلىتاۋ» ۇلتتىق تاريحي-مادەني جانە تابيعات مۇراجاي قورى باستاماشىلىعىمەن جەرگىلىكتى ءتۋريزمدى الىسقا تانىتۋعا ارنالعان باسقا دا جوبالار ىسكە اسىرىلادى. ايماقتىڭ ەڭ شالعاي وڭىرىنە ساياحاتشىلاردى كوپتەپ تارتۋ ەلەۋلى وزگەرىستەر اكەلمەك. دايىندىق جۇمىستارى اياسىندا بىرنەشە ازامات تۋريزمدىك قىزمەتتىڭ قىر-سىرىن ۇيرەنۋ ۇستىندە. ءجۇرگىزىلىپ جاتقان كەلىسىمدەرگە سايكەس جاز شىعا ەۋروپا ەلدەرىنەن ساياحاتشىلاردىڭ العاشقى توبى كەلىپ, ول كۇزگە دەيىن تولاستاماۋى ءتيىس.
ايقىن نەسىپباي,
«ەگەمەن قازاقستان».
قاراعاندى وبلىسى,
ۇلىتاۋ اۋدانى.