ورتالىق تەلەكوممۋنيكاتسيالار قىزمەتى الاڭىندا سولتۇستىك قازاقستان وبلىسىنىڭ جامان ىندەتتىڭ تارالۋىنا جول بەرمەۋ جونىندەگى شارالارى باياندالدى. ماسليحاتقا ءوڭىر اكىمىنىڭ ورىنباسارى اسقار ساقىپكەرەەۆ, وبلىستىق سانيتارلىق-ەپيدەميالىق باقىلاۋ دەپارتامەنتىنىڭ باسشىسى اسەت جۇماتاەۆ جانە دەنساۋلىق ساقتاۋ باسقارماسىنىڭ باسشىسى قابدىراحمان ساقتاعانوۆ قاتىستى.
اسقار جولامان ۇلىنىڭ ايتۋىنا قاراعاندا, قازىر وبلىستا جامان ىندەت جاعدايى تۇراقتالىپ كەلەدى. ۆاكتسينا الۋدى جالعاستىرۋ جانە باسقا دا الدىن الۋ شارالارىنىڭ ناتيجەسىندە ىندەتتىڭ تارالىمى ءبىرشاما ازايدى. پاندەميا باستالعاننان بەرى 23 354 ادام وسى ناۋقاسپەن تىركەلگەن. سوڭعى تاۋلىكتە 75 ادامنىڭ بويىنان جامان ىندەتتىڭ بەلگىلەرى تابىلعان. بۇعان دەيىنگى ەكى اپتادا بۇل كورسەتكىش 140-450-دەن كەم بولماعان ەدى. دەمەك تاۋلىكتىك كورسەتكىش سوڭعى اپتادا ەكى ەسە ازايعان. جالپى, ناۋقاسقا شالدىعۋ قازىر 44 پايىزعا دەيىن ازايىپ, 100 مىڭ ادامعا شاققاندا 195 ادامعا ءتۇسىپ وتىر. وبلىس 4 قىركۇيەكتەن بەرى «سارى ايماققا» وتكەن.
ا.ساقىپكەرەەۆ 3 اپتا بۇرىن ءبىر تاۋلىكتە 171 ادامنىڭ بويىنان ىندەت تابىلىپ, انتيرەكوردتىق كورسەتكىش بولعانىن ەسكە سالدى. «قازىر ىندەتكە شالدىققانداردىڭ 92 پايىزى ەمدەلىپ شىقتى. الايدا ىندەت باستالعاننان بەرى 181 ادام قايتىس بولدى», دەدى ول.
بارلىق ناۋقاستاردىڭ 65 پايىزىنان ىندەت وزدەرى ەمحانالارعا كەلگەندە انىقتالعان. ال ناۋقاسپەن قاتىناسقا تۇسكەندەردەن انىقتالعانى – 22 پايىز. سونىمەن قاتار پروفيلاكتيكالىق شارالار بارىسىندا بارلىق ناۋقاستىڭ 13%-ى انىقتالعان. ادامداردىڭ جاستارىنا قاراعاندا ناۋقاسقا شالدىققانداردىڭ ەڭ جوعارى ۇلەسى 60 جاستان اسقاندارعا تيەسىلى. بارلىق ناۋقاستىڭ 31%-ى وسى جاستىڭ ۇلەسىندە.
بۇگىنگى تاڭدا وبلىستىڭ بارلىق مەديتسينالىق مەكەمەسى شتاتتى رەجىمدە جۇمىس ىستەۋدە. جوسپارلى مەديتسينالىق كومەك توقتاتىلعان جوق. تۇرعىندار مەديتسينالىق كومەكتىڭ بارلىق ءتۇرىن كەدەرگىسىز الۋدا. وبلىستاعى جامان ىندەتپەن ناۋقاستانعاندارعا 1 715 توسەك بولىنگەن. ونىڭ 31%-ى قازىر تولىق. سونىمەن بىرگە 775 ورىن قوسىمشا بوس تۇر. جان ساقتاۋ بولىمىندەگى بارلىق 115 ورىننىڭ قازىر 58%-ى تولعان. ادامعا شاققاندا 67 ادام جانساقتاۋ بولىمىندە وتتەگىمەن دەم الىپ جاتىر. ولاردىڭ 22-ءسى ءوجت (يۆل) اپپاراتىنىڭ كۇشىمەن دەم الۋدا.
بۇگىنگى تاڭدا وبلىس اۋرۋحانالارىنا جەتەتىن مەديتسينالىق پرەپاراتتاردىڭ ەكى ايلىق قورى قوردالانعان. ال بولشەك ساۋدادا ءبىر ايلىق قور بار جانە ول جاڭالانىپ تۇرادى. سونىمەن قاتار تۇراقتاندىرۋ قورىندا 22 ءتۇرلى ءدارى-دارمەك قورى ساقتاۋلى.
حالىقتى ۆاكتسينالاۋ جۇمىستارى دا جاقسى جولعا قويىلعانى ايتىلدى. بۇگىنگى تاڭدا وبلىستا 102 ەگۋ كابينەتى, 62 جىلجىمالى ۆاكتسينالاۋ بريگاداسى, 8 جىلجىمالى كەشەن ۇيىمداستىرىلعان. بۇگىنگى تاڭدا ۆاكتسينانىڭ تولىق كۋرسىن 209 مىڭ ادام العان. بۇل ۆاكتسينا الۋعا نيەت بىلدىرگەندەردىڭ 67%-ى. ال ۆاكتسينانىڭ ءبىرىنشى كومپونەنتىن تۇرعىنداردىڭ 75 پايىزى الدى. سونىمەن بىرگە ەگۋدىڭ تولىق كۋرسىن العانداردىڭ اراسىنان 1 240 ادام ىندەتكە شالدىققان. بۇل ەگىلگەندەردىڭ 0,6 پايىزى.
«اشىق» قوسىمشاسىمەن وبلىستىڭ 2 554 نىسانى قامتىلدى. سول ارقىلى 300-دەن اسا ادامنان «قىزىل», 250 ادامنان «سارى» مارتەبە انىقتالدى. ولاردىڭ بارىنە ايىپپۇل سالىنىپ, 80 ادام ءۇي كارانتينىنە جابىلدى.
مونيتورينگتىك توپتار دا ءوز جۇمىسىن ناتيجەلى جۇرگىزۋدە. ءبىرىنشى قىركۇيەكتەن بەرى 92 رەيد جاسالىپ, 494 نىساندى قامتىدى. ناتيجەسىندە, 13 ادام جاۋاپكەرشىلىككە تارتىلدى.
مەكتەپ وقۋشىلارى ستاندارتتى وقۋ جۇيەسىندە وقىپ جاتىر. كانيكۋلدان كەيىن مەكتەپكە ورالعان وقۋشىلار اراسىنان 129 بالانىڭ بويىنان ىندەت تابىلعان. قازىر بۇل وقۋشىلار جانە ولارمەن قاتىناسقان ادامدار قاشىقتان وقۋ رەجىمىنە اۋىستىرىلدى.
جالپى وبلىستا دەنساۋلىق ساقتاۋ ماسەلەسىنە بيىل 3 ملرد تەڭگە باعىتتالىپ وتىر. 480 ورىندى كوپبەيىندى اۋرۋحانانىڭ قۇرىلىسى جالعاسۋدا. تاعى ءبىر جاڭا ەمحانا قۇرىلىسى قولعا الىنعان.
سولتۇستىك قازاقستان وبلىسى