ۇلتتىق ستاتيستيكا بيۋروسىنىڭ مالىمەتىنشە, قاڭتار-شىلدە ايلارىندا ەلگە 5 409 ادام كەلسە, ەلدەن كەتكەندەر سانى 18 198 ادامدى قۇرادى, دەپ حابارلايدى Egemen.kz.
ەلدىڭ نەگىزگى كوشى-قون الماسۋى تمد مەملەكەتتەرى اراسىندا ءجۇرىپ جاتىر. تمد ەلدەرىنەن كەلگەندەردىڭ ۇلەسى 84,3%-دى, كوشىپ كەتكەندەردىڭ ۇلەسى جالپى كوشىپ-قونۋشىلار سانىنىڭ 85,4%-ىن قۇرادى.
«2020 جىلعى قاڭتار-شىلدەمەن سالىستىرعاندا رەسپۋبليكا شەگىندە كوشىپ-قونۋشىلاردىڭ سانى 10,6%-عا ارتتى», دەپ اتاپ ءوتتى ۇلتتىق ستاتيستيكا بيۋروسى.
وڭىرارالىق ورىن اۋىستىرۋلار بويىنشا حالىقتىڭ كوشى-قونىنىڭ وڭ سالدوسى ەلدىڭ 4 وڭىرىندە قالىپتاستى: الماتى (16 902 ادام), نۇر-سۇلتان (14 222 ادام), شىمكەنت (8 965 ادام) قالالارىندا جانە ماڭعىستاۋ وبلىسىندا (310 ادام).