شەتەلدە تاعىلىمدامادان وتۋشىلەرگە ىرىكتەۋ جالعاسىپ جاتىر

جەتەكشى ماماندار مەملەكەت ەسەبىنەن الەمنىڭ ۇزدىك جوعارى وقۋ ورىندارى مەن عىلىمي ورتالىقتارىندا تاعىلىمدامادان ءوتىپ, بىرلەسكەن عىلىمي زەرتتەۋلەردى جۇرگىزە الادى. ولاردىڭ اراسىندا اقش (دجوردج ۆاشينگتون, ميچيگان, ۆايومينگ, ۆيسكونسين, پەنسيلۆانيا, بوستون, وگايو, ميدلبەرري حالىقارالىق زەرتتەۋلەر ينستيتۋتى), ۇلىبريتانيا (لوندون يمپەريالىق كوللەدجى, ريدينگ ۋنيۆەرسيتەتى, ليۆەرپۋل, Manchester Metropolitan University), گەرمانيا فەدەراتيۆتىك رەسپۋبليكاسى (گۋمبولدت اتىنداعى بەرلين ۋنيۆەرسيتەتى), جاپونيا (توكيو ۋنيۆەرسيتەتى), بەلگيا (KU Leuven) جانە ت.ب. ۋنيۆەرسيتەتتەر بار.

«مەملەكەت باسشىسىنىڭ تاپسىرماسى بويىنشا جىل سايىن 500 وتاندىق عالىم مەملەكەت ەسەبىنەن ءبىلىم الىپ, تاعىلىمدامادان ءوتىپ, بىرلەسكەن زەرتتەۋ جۇمىستارىن جۇرگىزە الادى. بيىل ءبىزدىڭ عالىمدار 80 ماماندىق بويىنشا اكادەميالىق وقۋدان جانە 137 ماماندىق بويىنشا تاعىلىمدامادان وتە الادى», دەدى ءبىلىم جانە عىلىم ۆيتسە-ءمينيسترى قۋانىش ەرعاليەۆ.

ۇزدىك شەتەلدىك وقۋ ورىندارىندا «عالىمدار» ساناتى بويىنشا تاعىلىمدامادان وتۋگە نيەت بىلدىرگەن عالىمداردى ىرىكتەۋ حالىقارالىق باعدارلامالار ورتالىعىمەن جۇرگىزىلەدى. اتالعان سانات بويىنشا تاعىلىمدامادان وتۋگە كانديداتتاردىڭ جالپى جۇمىس ءوتىلى كەمىندە ءۇش جىل بولۋى ءتيىس, ونىڭ ىشىندە سوڭعى 12 اي تاڭداعان ماماندىعى بويىنشا.

وتىنىشتەردى قابىلداۋ 28 قازانعا دەيىن جالعاسادى.