«تاليبان» قوزعالىسى بيومەتريكالىق مالىمەتتەردى انىقتاۋ ءۇشىن اۋعان-وزبەك شەكاراسىنا ارنايى قوندىرعى ورناتتى. بۇل تۋرالى ازاتتىقتىڭ وزبەك قىزمەتى اۋعانستاننىڭ مازاري-شاريف قالاسىنداعى دەرەككوزىنە سىلتەمە جاساپ حابارلادى, دەپ جازادى Egemen.kz.
«5 قىركۇيەككە دەيىن ادامدار وزبەكستانعا وزبەك ۆيزاسىمەن ءوتىپ جاتقان. بىراق وتكەن ءتۇنى تالىپتەر شەكارا بەكەتىنە بيومەتريكالىق قوندىرعى ورناتقان. قازىر وندا بۇرىنعى اۋعان ۇكىمەتىندە جۇمىس ىستەگەن قاۋىپسىزدىك كۇشتەرىنىڭ وكىلدەرى تۇرادى. ولاردىڭ قولىندا قازىرگى ۇكىمەت ازىرلەگەن تىزىمدەر بار. وندا قىلمىس جاساعانداردىڭ, شەتەلدىكتەرمەن جۇمىس ىستەگەندەردىڭ اتى-جوندەرى بار», دەپ جازادى ورتالىق ازيا جاڭالىقتار قىزمەتى دەرەككوزگە سىلتەمە جاساپ.
ونىڭ سوزىنشە, اۋعانستاننان وزبەكستانعا ءوتىپ جاتقانداردىڭ نەگىزگى بولىگىن كاسىپكەرلەر قۇرايدى.
بۇل مالىمەتتى اۋعانستانمەن شەكتەسەتىن سۇرحانداريا وبلىسىنداعى دەرەككوز دە راستاعان. ونىڭ سوزىنشە, تامىز ايىندا تالىپتەر اۋعانستاندى باسىپ العاننان كەيىن تاۋار تاسيتىن پويىزدار توقتاپ قالعان.
«400-گە جاقىن ۆاگون قانت, ۇن, كۇرىش جانە سۇيىق ماي سەكىلدى ازىق-ت ۇلىك وتكىزىلدى», دەدى ول.
تالىپتەر كابۋلدى باسىپ العاننان كەيىن ءبىرىنشى رەت اۋعانستان مەن وزبەكستان اراسىندا ساۋدا قارىم-قاتىناسى بويىنشا ارىپتەستىك ورناتۋدىڭ العاشقى بەلگىلەرى پايدا بولا باستادى.
1 قىركۇيەكتە وزبەكستاندىق جۇك تاسۋشى ەكى پويىز اۋعانستانعا بارعانى حابارلاندى. بۇل تالىپتەر بيلىككە كەلگەننەن كەيىنگى وزبەك تاراپتىڭ اۋعانستانعا جەتكىزگەن العاشقى كوممەرتسيالىق جۇگى.
وتكەن اپتادا «تاليبان» قوزعالىسى وزبەكستاننىڭ تاۋەلسىزدىك كۇنىنە وراي جولداعان قۇتتىقتاۋىندا تاشكەنتتى «ارىپتەس» دەپ اتاپ, وزبەك تاراپ ۇسىنعان ايماقتىق جوبالاردى قولداۋعا دايىن ەكەنىن مالىمدەگەن.