14-25 قىركۇيەك ارالىعىندا «سارىشاعان» پوليگونىندا تمد ەلدەرىنىڭ «جاۋىنگەرلىك دوستاستىق-2021» وقۋ-جاتتىعۋى وتەدى, دەپ جازادى Egemen.kz.
شاراعا اۋە شابۋىلىنا قارسى قورعانىس اسكەرلەرى مەن اسكەري-اۋە كۇشتەرىنەن 1 300-دەن استام اسكەري قىزمەتشى جانە 400-گە جۋىق قارۋ-جاراق پەن اسكەري تەحنيكا جۇمىلدىرىلادى. اتاپ ايتقاندا, س-300پس, س-75, س-125, «كۋب», «بۋك-م2ە» زەنيتتىك-زىمىران كەشەندەرى, راديوەلەكتروندىق كۇرەس بولىمشەلەرىنىڭ تەحنيكاسى, سۋ-30سم, سۋ-27 كوپفۋنكتسيونالدى جويعىشتارى, سونداي-اق س-295 اسكەري-كولىك ۇشاقتارى, ل-39 جاڭعىرتىلعان جاۋىنگەرلىك وقۋ-جاتتىعۋ ۇشاقتارى, مي-171ش, ەس-145 تىكۇشاقتارى جانە ۇشقىشسىز ۇشۋ اپپاراتتارى بار.
قورعانىس مينيسترلىگى ءباسپاسوز قىزمەتىنىڭ حابارلاۋىنشا, وقۋ-جاتتىعۋ كەزىندە شقق جاۋىنگەرلىك ەسەپتوپتارى زەنيتتىك-زىمىران كەشەندەرىنەن ءىس جۇزىندە وق اتادى. اسكەري اۆياتسيا ەكيپاجدارى اۋەدەگى جانە جەردەگى نىسانالاردى اۆياتسيا قۇرالدارىن ۇرىستا قولدانۋ ارقىلى زاقىمداي وتىرىپ, كۇندىزگى جانە تۇنگى ۇشۋلاردى پىسىقتايدى.
«وقۋ-جاتتىعۋ اسكەري باسقارۋ ورگاندارىنىڭ دايىندىق دەڭگەيىن, جاۋىنگەرلىك ەسەپتوپتار مەن ەكيپاجداردىڭ ۇيلەسىمدىلىگىن ارتتىرۋ, سونداي-اق اۋە شابۋىلىنا قارسى جانە اۋەدە شايقاستاردى جۇرگىزۋ تاسىلدەرىن پىسىقتاۋ ماقساتىندا وتكىزىلەدى. قارۋلى قاقتىعىستاردا اۆياتسيا مەن اۋە شابۋىلىنا قارسى قورعانىس اسكەرلەرىن قولدانۋدى ۇيىمداستىرۋ بويىنشا ءتۇرلى تاكتيكالىق ەپيزودتار كورسەتىلەدى», دەپ اتاپ ءوتتى اۋە قورعانىسى كۇشتەرى باس شتابىنىڭ باستىعى گەنەرال-مايور فازىلوللا بادەنوۆ.