حالىقارالىق ححح «سلاۆيان بازارى» كوركەمونەرپازدار فەستيۆالىنىڭ جەڭىمپازى رۋحيا بايدۇكەنوۆا تۋعان جەرىنە تاعزىم ەتە كەلدى. تالدىقورعان قالاسىنا تابان تىرەگەن ءان ونەرىنىڭ جاڭا جۇلدىزىن وبلىس اكىمى اماندىق باتالوۆ قابىلداپ, جاس ءانشى مەن ونىڭ ۇستازدارىنا سىي-قۇرمەت كورسەتتى.
– قازاقستان تاۋەلسىزدىگىنىڭ 30 جىلى ىشىندە وتانداستارىمىز وسى حالىقارالىق كوركەمونەرپازدار فەستيۆالىندە 3 رەت گران-پري يەگەرى اتانىپتى. ءۇشىنشىسىن مەن ۇتتىم. ەلىم ءۇشىن مەرەيلى جىلى ونەرىمدى كورسەتىپ, جەڭىسكە جەتكەنىم كەۋدەمە ماقتانىش سەزىمىن ۇيالاتادى. ماعان ساحنادا ونەر كورسەتىپ ۇيرەنگەن تاجىريبەم كوپ كومەكتەستى. ويتكەنى ەلدە جۇرگەندە «تالدىقورعان اۋەندەرى» ءانسامبلىنىڭ قۇرامىندا ساحنادا ونەر كورسەتتىم. بۇل بويىمداعى قوبالجۋدى جەڭۋگە سەپتىگىن تيگىزدى. تالدىقورعاندىقتاردىڭ ماعان دەگەن سەنىمى كۇش بەرىپ, جەڭىس تۇعىرىنا كوتەردى. سول سەبەپتى جەڭىمپازعا بەرىلگەن ستاتۋەتكانى وبلىس باسشىسى اماندىق عابباس ۇلىنا تابىس ەتكىم كەلەدى, – دەدى كەزدەسۋدە جاس ءانشى رۋحيا بايدۇكەنوۆا.
ال ءوز كەزەگىندە ايماق اكىمى بويىنداعى تالانت پەن ەڭبەكقورلىعىنىڭ ارقاسىندا قازاقستاندى حالىقارالىق ارەنادا تانىتقان دارىندى جەرلەسىنە اتالىق اق تىلەگىن ارناپ, باتاسىن بەردى.
– وسى بايقاۋدا جەڭىمپاز اتاندى دەگەندى ەستىگەندە قاتتى قۋاندىم. بۇل – ۇلكەن جەتىستىك. قازاقستاندى الەمدىك دەڭگەيگە تانىتا ءبىلدىڭ. بويىڭداعى تالانتىڭا ءسوز جوق. بىراق ەڭبەك پەن العا دەگەن ۇمتىلىس سەنى جەڭىس تۇعىرىنا كوتەردى. بايقاۋ الدىندا كەزدەسكەنىمىزدە وزىڭە شىن كوڭىلدەن ساتتىلىك تىلەپ ەدىم. تىلەگىمنىڭ ورىندالعانىنا قۋانىپ وتىرمىن. ەسىمدەرى تاريحتا التىن ارىپتەرمەن جازىلعان روزا باعلانوۆا, بيبىگۇل تولەگەنوۆا, الىبەك دىنىشەۆ ەسىمدى ۇلى تالانت يەلەرى سياقتى بيىك بەلەستەردەن كورىنە بەر. ءوزىڭنىڭ ەرەكشە تابيعي داۋىسىڭ ارقىلى كوپتىڭ جۇرەگىن جاۋلاپ, شىڭداردى باعىندىرعايسىڭ. بۇل سەنىڭ قولىڭنان كەلەتىنىنە سەنىمدىمىن. بويىڭداعى ۇمتىلىس پەن بولاشاققا قويعان ماقساتىڭ ايقىن. ونىڭ ۇستىنە تالانتتى, ەڭبەكقور جاسسىڭ. ءبىز شىن كوڭىلىمىزدەن سەنىڭ جەتكەن جەتىستىگىڭە قۋانامىز. ماقتان ەتىپ قانا قويماي, ساتتىلىك سەرىك بولاتىنىنا سەنەمىز. ال جەڭىس پەن جەتىستىكتىك بەلگىسىندەي بولعان بۇل ستاتۋەتكانى م.تىنىشپاەۆ اتىنداعى وبلىستىق تاريحي-ولكەتانۋ مۇراجايىنا ساقتاۋعا تاپسىرامىن, – دەدى ءوز سوزىندە اماندىق باتالوۆ.
وسى كەزدەسۋدە رۋحيانىڭ العاشقى ۇستازى سەرىكجامال اجىبەكوۆا دا ءسوز الىپ, تالانتتى شاكىرتىنە دەگەن تەبىرەنىسىن تولقي وتىرىپ جەتكىزدى.
– ارىپتەستەرىم ماعان زەينەتكەرلىككە شىققان سوڭ دا جۇمىسىمدى ءارى قاراي جالعاستىرۋدى ۇسىندى. ونەر مەكتەبىندە تالانتتى شاكىرتتەردى جيناپ, ارنايى سىنىپ اشىپ بەردى. سول تالانتتىلاردىڭ ىشىندە رۋحيا دا بولدى. ول ەڭبەكقورلىعىمەن جانە ىنتاسىمەن ەرەكشەلەندى. تاڭ اتىسىنان كەشتىڭ باتىسىنا دەيىن ساباققا بەرىلىپ وتىراتىن. ونىڭ وسى قاسيەتى حالىقارالىق كونكۋرستا جەڭىمپاز اتانۋىنا سەرپىن بولدى. مەن ونىڭ جەتىستىگىن ءارى ۇستازى بولعانىمدى ماقتان تۇتامىن, – دەدى ۇستاز.
ال ءانشى قىزبەن بىرگە جەتىسۋ جۇرتىنىڭ قۋانىشىن بولىسۋگە كەلگەن بەلگىلى تەلەجۇرگىزۋشى قىمبات دوسجان رۋحيانىڭ حالىقارالىق بايقاۋعا قاتىسۋ ءۇشىن ۇلكەن تاۋەكەلگە بارعانىن تىلگە تيەك ەتتى.
– رۋحيا كونكۋرسقا قاتىساتىن ۋاقىتتا ونىڭ قولىندا ۇشاقتىڭ بيلەتى عانا بولدى. وسى ساتتە وبلىس تاراپىنان كورسەتىلگەن كومەك پەن قولداۋ ونىڭ ەرىك-جىگەرىن نىعايتتى. جەرلەستەرىنىڭ قولداۋى ونىڭ كۇشىنە اينالىپ, جەڭىسكە جەتەلەدى. وسىلايشا, الماتى وبلىسىندا مادەنيەت سالاسىنا كوپ كوڭىل ءبولىنىپ جاتقاندىعى دالەلدەندى, – دەيدى قىمبات دوسجان.
رەسمي كەزدەسۋدەن كەيىن جەڭىمپاز ءانشى رۋحيا بايدۇكەنوۆا جەرلەستەرىمەن جۇزدەستى. ءانشى قىزعا تالدىقورعان قالاسىنىڭ مەتسەناتتارى مەن كاسىپكەرلەرى Hyundai ماركالى اۆتوكولىگىن سىيعا تارتتى. سونداي-اق رۋحيانىڭ ۇستازى سەرىكجامال اجىبەكوۆا مەن قولداۋشىسى قىمبات دوسجانعا 1 ملن تەڭگەنىڭ سەرتيفيكاتىن تابىستادى.
وسىلايشا تالدىقورعاندىقتار تالانتتى جاستىڭ ونەرىنە دەگەن سۇيىسپەنشىلىگىن ءبىلدىردى.
الماتى وبلىسى