قاراعاندى قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى وساكاروۆ اۋدانىنىڭ پيونەر اۋىلدىق وكرۋگىنىڭ اكىمىن كىناسىز دەپ تانىدى, دەپ حابارلايدى Egemen.kz.
اكىمشىلىك قۇقىق بۇزۋشىلىق تۋرالى ءىستى سۋديا مارات حوجابەرگەنوۆ قارادى. سوت جابىرلەنۋشىنىڭ اكىمنىڭ تۋىسى ەكەنىن جانە ولاردىڭ اراسىندا دۇشپاندىق قارىم-قاتىناس ورناعانىن انىقتادى.
سوتتا جابىرلەنۋشى اكىم وعان دەنە جاراقاتىن تيگىزدى دەپ مالىمدەدى. ايەلدىڭ تۋىسى دا ونىڭ سوزدەرىن راستادى. ال اكىمنىڭ ءوزى كىناسىن مويىندامادى. ونىڭ پايداسىنا ءبىر ادام كۋا بولدى.
تاراپتار ايعاقتارىنىڭ سايكەس ەمەستىگىن ەسكەرگەن سوت جابىرلەنۋشىنى تەكسەرگەن ساراپشىنىڭ ايعاقتارىن تىڭداپ, جاراقاتتار قاقتىعىستان بىرنەشە كۇن بۇرىن پايدا بولعانىن ايتتى.
ساراپشىنىڭ ايعاقتارىن نەگىزگە الا وتىرىپ, سۋديا اكىمگە قاتىستى اكىمشىلىك ءىس جۇرگىزۋدى توقتاتىپ, ءتيىستى قاۋلى شىعاردى.
«مەديتسينالىق كۋالاندىرۋ وسى جىلدىڭ 8 شىلدەسىندە جۇرگىزىلدى. سوتتا سوت-مەديتسينالىق ساراپشى جابىرلەنۋشىدەن تابىلعان دەنە جاراقاتتارى كۋالاندىرۋ كەزىندە بەس تاۋلىكتەن استام ۋاقىت ىشىندە پايدا بولعانىن, ال ءىس ماتەريالدارى بويىنشا جانجال وسى جىلدىڭ 5 شىلدەسىندە بولعانىن كاتەگوريالىق تۇردە مالىمدەدى. بۇل كۇنى دەنە جاراقاتىن الۋ مۇمكىن بولمادى. سوت جوعارىدا كورسەتىلگەن دالەلدەمەلەردى باعالاپ, كىنالىلىككە قاتىستى كەز كەلگەن كۇمان اكىمشىلىك قۇقىق بۇزۋشىلىق تۋرالى ءىس قوزعالعان ادامنىڭ پايداسىنا تۇسىندىرىلەتىنىن ەسكەرە وتىرىپ, ونىڭ ءىس-ارەكەتىندە اكىمشىلىك قۇقىق بۇزۋشىلىق قۇرامىنىڭ بولماۋىنا بايلانىستى كوكيشەۆكە قاتىستى اكىمشىلىك ءىس بويىنشا ءىس جۇرگىزۋدى توقتاتۋ تۋرالى شەشىم قابىلدادى», دەپ اتاپ ءوتتى سوتتىڭ ءباسپاسوز قىزمەتى.