ۋكراينادا جيىن وتكىزۋ تۋرالى قابىلدانعان زاڭ جاڭا نارازىلىق تولقىنىن تۋدىردى. بۇل تۋرالى Azattyq.org حابارلادى.
ەندى وپپوزيتسيا جەتەكشىلەرى ۇكىمەتتى وزگەرتۋ تۋرالى عانا ەمەس, قايتا پرەزيدەنتتىك سايلاۋ وتكىزۋ تۋرالى دا تالاپ قويا باستادى.
19 قاڭتاردا جيىن وتكىزۋگە قاتىستى ۋكراينا پرەزيدەنتى بەكىتكەن زاڭعا قارسى ونداعان مىڭ دەمونسترانت كيەۆتەگى تاۋەلسىزدىك الاڭىنا جينالدى. ونىڭ ارتى ەرەۋىلشىلەر مەن ءتارتىپ ساقشىلارى اراسىنداعى قاقتىعىسقا ۇلاستى.
يتار-تاسس اگەنتتىگىنىڭ اقپارى بويىنشا, كيەۆ ورتالىعىنداعى «دينامو» الاڭى ماڭىندا دەمونسترانتتار مەن «بۇركىت» ارنايى جاساعىنىڭ ساربازدارى اراسىنداعى 16 ساعاتقا سوزىلعان قىزۋ ۇرىستىڭ سالدارىنان ەكى جاقتان 100-دەن اسا ادام جاراقات العان. ەرەۋىلشىلەر پوليتسيا جاساقتارىنىڭ قورشاۋىنداعى پارلامەنت عيماراتىنا قاراي وتپەك بولعان تاعى ءبىر توپ ءتارتىپ ساقشىلارىن تاياقتىڭ استىنا العان. قۇقىق قورعاۋ ورگانىنىڭ وكىلدەرى نارازى توپتى گاز شاشىپ تاراتپاق بولدى. قاقتىعىس كەزىندە ەرەۋىلشىلەر ىشكى ىستەر مينيسترلىگىنىڭ ءتورت اۆتوبۋسى مەن ەكى جۇك كولىگىن ورتەپ جىبەرگەن. ۋكراينا وپپوزيتسياسى جەتەكشىلەرىنىڭ ءبىرى ۆيتالي كليچكو جيىن وتكىزۋ تۋرالى جاڭا زاڭدى «زاڭسىز» جانە «كونستيتۋتسياعا قارسى دەپ سيپاتتادى. «ءبىز وتە ماڭىزدى شەشىم قابىلداۋعا ءتيىسپىز. بىرىنشىدەن, 16 قاڭتاردا «ايماقتار» پارتياسىنىڭ ۇسىنىسى بويىنشا پارلامەنت مۇشەلەرى قابىلداعان زاڭداردى جارامسىز جانە زاڭسىز دەپ تانيمىز. ەكىنشىدەن, مەرزىمىنەن بۇرىن پرەزيدەنت سايلاۋىن وتكىزۋ ماسەلەسىن داۋىسقا سالۋىمىز كەرەك. ۇشىنشىدەن, سايلاۋ اشىق, ءارى ءادىل ءوتۋى ءۇشىن ورتالىق سايلاۋ كوميسسياسىنىڭ مۇشەلەرىن اۋىستىرۋ قاجەت» – دەدى ۆيتالي كليچكو. سونداي-اق ول دەمونسترانتتاردى پوليتسيانىڭ كۇش قولدانۋىنا تۇرتكى بولاتىنداي ارانداتۋ ارەكەتتەرىنە بارماۋعا شاقىردى. ۋكراينا وپپوزيتسياسى ۆيكتور يانۋكوۆيچتى «ديكتاتورلىق بيلىك جۇيەسىن ورناتپاقشى» دەپ ەسەپتەيدى. 16 قاڭتاردا يانۋكوۆيچ قول قويعان جاڭا زاڭ رەسمي رۇقساتسىز قوعامدىق جەرلەرگە شاتىر تىگۋگە, ساحنا قۇرۋعا جانە داۋىس زورايتقىش قويۋعا تىيىم سالادى. سونىمەن قاتار, جاڭا زاڭ بويىنشا دەمونسترانتتار بەتتەرىن بۇركەمەۋى ءتيىس. وسى جولعى نارازىلىق شەرۋىنە شىققان ەرەۋىلشىلەر زاڭدى ءاجۋالاپ مەديتسينالىق ماسكا مەن قۇرىلىسشى كاسكالارىن كيىپ شىقتى. باستارىنا ىدىس-اياق كيىپ شىققاندار دا بولعان. جاڭا زاڭ بويىنشا, «قوعامدىق ءتارتىپتى بۇزۋشىلارعا» 15 جىلعا دەيىن تۇرمە جازاسى قاراستىرىلعان ەكەن. بۇل زاڭنىڭ قابىلدانۋىنا كەدەرگى كەلتىرۋ ءۇشىن جەرگىلىكتى دەمونسترانتتار دەپۋتاتتاردى پارلامەنت عيماراتىنا وتكىزبەۋگە تىرىسىپ, ەلەكتروندىق سايلاۋ جۇيەسىنىڭ جۇمىسىنا كەدەرگى كەلتىرمەك بولعان.
ايدار ورىسباەۆ.
دەرەككوز: Azattyq.org
فوتو: Itar-tass.com