كوروناۆيرۋسقا شالدىققانداردىڭ 99,9 پايىزى ۆاكتسينا سالدىرماعاندار. بۇل تۋرالى بۇگىن ۇكىمەت وتىرىسىندا قر دەنساۋلىق ساقتاۋ ءمينيسترى الەكسەي تسوي ايتتى, دەپ حابارلايدى Egemen.kz.
«بۇگىندە 5,9 ميلليون ادام ۆاكتسينانىڭ 1 كومپونەنتىمەن ەگىلدى. بۇل ەكپە الۋعا ءتيىستى حالىقتىڭ 59 پايىزىن قۇرايدى. 2 كومپونەنتتى ەكپە الۋعا قاجەتتى حالىقتىڭ 45,2 پايىزى شامامەن 4,5 ميلليون ادام الدى. ۆاكتسيناتسيانىڭ 1-دوزاسىمەن ەڭ تومەنگى قامتۋ پروتسەنتى ماڭعىستاۋ وبلىسىندا بايقالادى. وڭىرلەر ۆاكتسينانىڭ جەتكىلىكتى كولەمىمەن قامتاماسىز ەتىلگەن. ۆاكتسينانى جەتكىزۋ كەستەگە سايكەس جۇرگىزىلىپ جاتىر. ۆاكتسيناتسيانىڭ تيىمدىلىگىن باعالاۋ بارىسىندا اۋرۋدىڭ 99,9 پايىزى ۆاكتسينا الماعاندارعا تيەسىلى ەكەندىگى انىقتالدى. بۇل رەتتە ۆاكتسيناتسيادان كەيىن اۋىرعانداردىڭ ۇلەسى نەبارى 0,1 پايىزدى قۇرايدى», دەدى الەكسەي تسوي.
ءمينيستردىڭ ايتۋىنشا, ەكپە الماعاندار اراسىندا COVID-19-دان ءولىم-ءجىتىم ۇلەسى 97,7 پايىزدى قۇرايدى. ال ۆاكتسيناتسيا العاندار اراسىندا قايتىس بولعاندار 2,3 پايىزدى قۇراپ وتىر. بۇل رەتتە ولاردىڭ اۋىر سوزىلمالى اۋرۋلارى بولعان.
«بۇل فاكتى COVID-ءتىڭ اۋىر سالدارىنىڭ الدىن الۋداعى ۆاكتسيناتسيانىڭ تيىمدىلىگىن تاعى ءبىر مارتە دالەلدەيدى», دەدى ول.