تاي وپپوزيتسيونەرلەرى دۇيسەنبى كۇنى تاڭەرتەڭ ەل استاناسىنداعى جەتى شەشۋشى كولىكتىك تارماقتار مەن بىرقاتار اۆتوجولداردى جاۋىپ, «بانگكوكتى جابامىز» اتتى اكتسيانى رەسمي تۇردە باستادى.
ءبىز جەڭگەنىمىزگە نە جەڭىلگەنىمىزگە قاراماستان, كۇرەسە بەرەتىن بولامىز. ءبىز بىتىمگە بارمايمىز جانە كەلىسسوزدەرگە وتىرۋعا كەلىسپەيمىز, دەپ اتاپ كورسەتكەن وپپوزيتسيا كوسەمى سۋتەپ تاۋگسۋبان ميتينگىدە سويلەگەن سوزىندە. وسىنىڭ الدىنداعى كۇنى قالاعا تانكتەر ەنگىزىلگەن بولاتىن, بىراق نارازىلىققا قاتىسۋشىلار مەن قۇقىق قورعاۋشىلار اراسىندا قاقتىعىس تۋىنداي قويعان جوق. ازىرگە شەرۋلەر بەيبىت سيپاتتا وتۋدە.
شاراينا
وپپوزيتسيا «بانگكوكتى جابامىز» شاراسىن باستادى
تاي وپپوزيتسيونەرلەرى دۇيسەنبى كۇنى تاڭەرتەڭ ەل استاناسىنداعى جەتى شەشۋشى كولىكتىك تارماقتار مەن بىرقاتار اۆتوجولداردى جاۋىپ, «بانگكوكتى جابامىز» اتتى اكتسيانى رەسمي تۇردە باستادى.
ءبىز جەڭگەنىمىزگە نە جەڭىلگەنىمىزگە قاراماستان, كۇرەسە بەرەتىن بولامىز. ءبىز بىتىمگە بارمايمىز جانە كەلىسسوزدەرگە وتىرۋعا كەلىسپەيمىز, دەپ اتاپ كورسەتكەن وپپوزيتسيا كوسەمى سۋتەپ تاۋگسۋبان ميتينگىدە سويلەگەن سوزىندە. وسىنىڭ الدىنداعى كۇنى قالاعا تانكتەر ەنگىزىلگەن بولاتىن, بىراق نارازىلىققا قاتىسۋشىلار مەن قۇقىق قورعاۋشىلار اراسىندا قاقتىعىس تۋىنداي قويعان جوق. ازىرگە شەرۋلەر بەيبىت سيپاتتا وتۋدە.
دونور ەلدەردەن 6,5 ملرد. دوللار كومەك سۇرالماق
بۇۇ سيرياداعى قاقتىعىستاردان زارداپ شەككەندەرگە كومەك كورسەتۋ ءۇشىن الداعى سيريا بويىنشا دونور ەلدەر كونفەرەنتسياسىنان 6,5 ملرد. دوللار جيناماق نيەتتە. بۇل تۋرالى بۇۇ باس حاتشىسىنىڭ گۋمانيتارلىق ماسەلەلەر جونىندەگى ورىنباسارى ۆالەري اموس ءوز مالىمدەمەسىندە حابارلاعان.
ءبىز 6,5 ملرد. سۇراپ وتىرمىز. ءبىز ەرەۋىلشىلەر مەن ۇكىمەتتىك اسكەرلەر اراسىنداعى قاندى قاقتىعىستان زارداپ شەككەن بالالارعا, ايەلدەر مەن ەركەكتەرگە كومەك كورسەتۋ ءۇشىن قولدان كەلگەننىڭ ءبارىن جاسايتىن بولامىز, دەپ اتاپ كورسەتىلگەن مالىمدەمەدە. ونىڭ ايتۋىنشا, بۇگىندە 13 ميلليوننان استام سيريالىق كومەككە ءزارۋ. ايتا كەتۋ كەرەك, كونفەرەنتسيا 14 قاڭتاردا كۋۆەيتتە بۇۇ باس حاتشىسى پان گي مۋننىڭ توراعالىعىمەن وتەدى.
جاڭا كونستيتۋتسيانى قولداۋعا شاقىردى
ەگيپەتتىڭ ۋاقىتشا پرەزيدەنتى ادلي مانسۋر ەل تۇرعىندارىن جاڭا كونستيتۋتسيانىڭ جوباسى بويىنشا وتەتىن رەفەرەندۋمدا وعان قولداۋ كورسەتۋگە شاقىردى.
مەن سىزدەردى قازىرگى زامانعى زايىرلى مەملەكەتتىڭ نەگىزىن قالايتىن جاڭا كونستيتۋتسيا ءۇشىن داۋىس بەرۋگە شاقىرامىن, دەپ مالىمدەگەن مانسۋر ەگيپەت تەلەديدارى ارقىلى سويلەگەن سوزىندە. ءبىز ءۇشىن ءوزىمىزدىڭ يسلامدىق قۇندىلىقتارىمىز بەن قاعيداتتارىمىزدى قورعاۋ وتە قاجەت, بىراق سونىمەن بىرگە, ءبىز ءدىني شەكتەلۋشىلىكتەن دە ارىلۋعا ءتيىسپىز, دەپ اتاپ كورسەتكەن ول. ەسكە سالا كەتەيىك, جاڭا كونستيتۋتسيا بويىنشا رەفەرەندۋم ەگيپەتتە 14-15 قاڭتاردا وتەدى.
يزرايل شارونمەن قوشتاسۋدا
ءيزرايلدىڭ بۇرىنعى پرەمەر-ءمينيسترى اريەل شارونمەن قوشتاسۋدىڭ رەسمي ءراسىمى دۇيسەنبى كۇنى تاڭەرتەڭ باستالدى, دەپ حابارلادى جەرگىلىكتى باق-تار.
كنەسسەتتە ءوتىپ جاتقان بۇل ءىس-شاراعا يزرايل پرەزيدەنتى شيمون پەرەس پەن پرەمەر-ءمينيسترى بينيامين نەتانياحۋ قاتىستى. يزرايل ۇكىمەتىنىڭ بۇرىنعى باسشىسى 2006 جىلدان بەرى ينسۋلت سالدارىنان ەس-ءتۇسسىز جاتقان اريەل شارون وتكەن سەنبى كۇنى 85 جاسىندا ەلدىڭ شەبا اۋرۋحاناسىندا كوز جۇمعان بولاتىن.
قاتەلەسىپ باسقا اۋەجايعا قوندى
امەريكالىق Southwest Airlines اۋە كومپانياسىنىڭ بوينگ-737 جولاۋشىلار لاينەرى ميسسۋري شتاتىنداعى برانسونا اۋەجايىنا بارۋدىڭ ورنىنا قاتەلەسىپ, تەيني گرافتىعىنداعى اۋەجايعا بارىپ قونعان.
قونۋ شتاتتىق رەجىمدە ءوتتى, بارلىق جولاۋشىلار مەن ەكيپاج قاۋىپسىز جاعدايدا, دەپ مالىمدەگەن اۋە كومپانيا وكىلى ورىن العان وقيعاعا تۇسىنىك بەرە وتىرىپ. اۋە لاينەرىنىڭ بورتىندا 124 جولاۋشى مەن ەكيپاجدىڭ بەس مۇشەسى بولعان كورىنەدى. قازىرگى ۋاقىتتا اقش-تىڭ فەدەرالدىق اۆياتسيا باسقارماسى ورىن العان وقيعانىڭ سەبەپتەرىن تەرگەۋدە.
تەھران 4,2 ملرد. دوللارعا قول جەتكىزبەك
«التىلىق» پەن تەھران 20 قاڭتاردا بىرلەسكەن ءىس-قيمىل جوسپارىن جۇزەگە اسىرۋدى باستايدى. سانكتسيالاردىڭ جۇمسارتىلۋى ناتيجەسىندە, يران تىيىم سالىنعان 4,2 ملرد. دوللارعا قول جەتكىزۋ مۇمكىندىگىنە يە بولماق.
ەۋروپا وداعىنىڭ سىرتقى ىستەر جونىندەگى جوعارعى وكىلى كەترين ەشتون جەنەۆادا 9-10 قاڭتاردا وتكەن كەلىسسوزدەر قورىتىندىسىنا ءوزىنىڭ قاناعاتتانعاندىعىن ءبىلدىردى. ەندى قۇرامىندا ۇلىبريتانيا, گەرمانيا, فرانتسيا, رەسەي, قىتاي جانە اقش بار دەلدالدار «التىلىعى» 2014 جىلدىڭ 20 قاڭتارىنان باستاپ, ۋاعدالاستىقتىڭ العاشقى قادامدارىن جۇزەگە اسىرۋعا كىرىسپەك. ءبىز ماگاتە-دەن قاجەت يادرولىق مونيتورينگ پەن قىزمەتكە تەكسەرۋ جۇرگىزۋدى سۇرايتىن بولامىز, دەلىنگەن جەكسەنبى كۇنى كەشكىلىك بريۋسسەلدە ەشتون تاراتقان مالىمدەمەدە.
اتوم ەنەرگياسى سالاسىنداعى ىنتىماقتاستىق
رەسەيدىڭ ۆەنگرياداعى بىردەن-ءبىر اتوم ەلەكتر ستانساسىنىڭ قۇرىلىسىن ودان ءارى جالعاستىرۋعا كەلىسىم الۋى مۇمكىن. «روساتوم» مەملەكەتتىك كورپوراتسياسىنىڭ باسشىسى سەرگەي كيريەنكونىڭ ايتۋىنشا, رەسەي مەن ۆەنگريا اتوم سالاسىنداعى ىنتىماقتاستىقتى جالعاستىرۋ جونىندە بەلسەندى كەلىسسوزدەر جۇرگىزۋدە.
14 قاڭتاردا رەسەي پرەزيدەنتى ۆلاديمير ءپۋتيننىڭ شاقىرۋىمەن ۆەنگريا پرەمەر-ءمينيسترى ۆيكتور وربان ماسكەۋگە جۇمىس ساپارىمەن كەلمەك. الداعى كەلىسسوزدەردىڭ باعدارلاماسىنىڭ ەگجەي-تەگجەيى ازىرگە بەلگىسىز. دەگەنمەن, ۆەنگەرلىك Nepszabadzag گازەتى بەلگىلى ءبىر اقپارات كوزدەرىنە سىلتەمە جاساي وتىرىپ, ساپار بارىسىندا «پاكشانىڭ» قۇرىلىسىن ودان ءارى جالعاستىرۋ جونىندەگى كەلىسىمگە قول قويىلۋى مۇمكىن ەكەنىن حابارلاعان. باسىلىمنىڭ مالىمەتتەرىنە قاراعاندا, بارلىق ۇمىتكەرلەردىڭ ىشىندە تەك «روساتوم» عانا جالپى قۇنى شامامەن 18 ملرد. دوللار بولاتىن جوبانى الدىن الا قارجىلاندىرۋدى قامتاماسىز ەتۋگە دايىن.
ينتەرنەت ماتەريالدارى نەگىزىندە ازىرلەندى.