بيىلعى مامىر ايىندا مامليۋت اۋدانى تۇرعىنىنىڭ قورادا تۇرعان جىلقىسى ۇرلانعان. مال يەسى پوليتسياعا شاعىم تۇسىرگەنىمەن, ەش ناتيجە بولماي, مال قولدى بولىپ كەتكەن ەدى. الايدا كۇدىكتىلەر كوپ ۋاقىت وتكەن سوڭ كورشىلەس جامبىل اۋدانىنىڭ اۋماعىنان ۇستالدى.
ولار وزدەرىنىڭ بۇرىن جىلقى ۇرلاعانىن مويىنداعان. وعان قوسا, تاعى ءۇش قوي ۇرلاعان. ۇرلىققا دانىككەندەر قىزىلجار اۋدانىنىڭ 34 جاستاعى جانە پەتروپاۆل قالاسىنىڭ 43 جاستاعى تۇرعىنى بولىپ شىقتى. ەكەۋى دە بۇرىن وسىنداي قىلمىستار جاساپ, سوتتالعان.
سوڭعى رەت قاراقشىلار جامبىل اۋدانىندا ەكى قوي ۇرلاعان. ەندى ەكەۋى دە بىرنەشە رەت جاساعان قىلمىستارى ءۇشىن مال يەسىمەن كەلىسىمگە كەلسە دە مەرزىمدى جازالارىن تەمىر توردىڭ ار جاعىندا وتەيدى. قازىر ولاردىڭ ۇستىنەن سوتقا دەيىنگى تەرگەۋ جۇرگىزىلۋدە.
«كۇدىكتىلەردىڭ ايتۋىنشا, ولار جالعا العان كولىكپەن قوزعالا وتىرىپ, ەركىن جايىلىمدا جۇرگەن جانۋارلاردى نەمەسە باقتاشىنىڭ قاراۋىنسىز قالعان مالداردى اڭدىعان. ۇرلانعان مالداردى وزدەرىنىڭ بىرەۋىنىڭ جەر ءۇيىنىڭ اۋلاسىندا مۇشەلەپ سويعان. قازىرگى ۋاقىتتا كۇدىكتىلەر تەرگەۋ وقشاۋلاعىشىندا قاماۋدا وتىر», دەدى اۋداندىق پوليتسيا ءبولىمى باستىعىنىڭ مىندەتىن اتقارۋشى پوليتسيا كاپيتانى يسا مۇستافين.
جالپى, جىل باسىنان بەرى وبلىستا 18 مال ۇرلاۋ فاكتىسى تىركەلىپ, بۇگىنگى تاڭدا ونىڭ 16-سى اشىلعان. سونىڭ ىشىندە ءبىر وتار قوي جوعالىپ كەتكەن. ءدال وسى مامليۋت اۋدانىنىڭ ءبىر تۇرعىنى جۋىردا ءوزىنىڭ 53 قويى مەن 5 ەشكىسى جوعالعانىن ايتىپ پوليتسياعا شاعىمدانعان. ول قويلارىن اۋىلدان 3 كم جەرگە ادەتتەگىدەي جايىلىمعا جىبەرگەن. 2-3 ساعاتتان كەيىن قاراپ قويماق بولىپ كەلسە, مالى ۇشتى-كۇيلى جوق بولعان. بۇل اۋىل رەسەي فەدەراتسياسىمەن شەكتەسەدى. مالىن بىرەۋ شەكارادان ايداپ اكەتتى مە دەپ جانۇشىرعان مال يەسى پوليتسياعا جۇگىنەدى. پوليتسيا جەدەل ءىس-شارا جاساپ, ءتورت توپپەن جان-جاقتان جوعالعان مالدى ىزدەۋگە كىرىسەدى. 5 قىزمەتكەردەن تۇراتىن تاعى ءبىر توپ جاقىن ماڭداعى اۋىلدارعا بارىپ, ءۇي-ءۇيدى ارالاعان, جەرگىلىكتى تۇرعىندار مەن باقتاشىلاردان سۇراستىرعان. ۋچاسكەلىك ينسپەكتورلار WhatsApp مەسسەندجەرى ارقىلى باعدارلاردى فەرمەرلىك جانە شارۋا قوجالىقتارىنىڭ جۇمىسكەرلەرىنە تاراتقان.
كەلەسى كۇنى ىزدەۋ جۇمىسىمەن 5 توپ اينالىسىپ, پوليتسەيلەر بىرلەسكەن ىزدەۋ جۇرگىزۋ ءۇشىن شەكاراشىلارعا دا جۇگىنگەن. قاتتى جاۋعان نوسەر تەحنيكانىڭ جۇرۋىنە كەدەرگى كەلتىرەدى. ورمان, دالا, كول جاعالارىن رەزەڭكە ەتىكپەن جاياۋ ارالاۋعا تۋرا كەلگەن.
وسىنداي ءجىتى ىزدەستىرۋدىڭ ارقاسىندا 40 قوي تەك 14 شىلدە كۇنى قالىڭ ورماننىڭ ىشىنەن تابىلادى. كەيىن باتپاق ماڭىنان ءبولىنىپ قالعان جانۋارلار دا تابىلدى. مالى تابىلعان يەسىنىڭ قۋانىشىندا شەك جوق. الايدا وعان مالىن باقتاشىعا بەرمەي, يەسىز قالدىرعانى ءۇشىن اكىمشىلىك جازا قولدانىلادى.
«جىل باسىنان بەرى اۋداندا وسىمەن بەسىنشى رەت مال جوعالىپ وتىر. ءبىز مال يەلەرىن جايۋ ەرەجەلەرىن قاتاڭ ساقتاۋعا شاقىرعانىمىزبەن, ونى ورىنداعىسى كەلمەيتىندەر كوپ. ەركىن جايىلىم مال ۇرىلارىنا جانە جانۋارلاردىڭ ءوز بەتىمەن قاڭعىپ كەتۋىنە جاعداي جاسايدى. قاڭعىپ جۇرگەن مال جول قوزعالىسى قاتىسۋشىلارىنا دا قاۋىپ توندىرەتىنىن ۇمىتپاعان ءجون», دەدى كاپيتان ي.مۇستافين.
«باقپاساڭ, مال كەتەدى» دەگەن وسى, يەلەرى مالدارىن باقتاشىعا تاپسىرماسا, وسىنداي ماشاقاتتىڭ اياق استىنان شىعا بەرەرى انىق.
سولتۇستىك قازاقستان وبلىسى,
مامليۋت اۋدانى