قازاقستان بويىنشا 30 جىل بۇرىنعى ىستىقتىڭ رەكوردىن جاڭارتقان بيىلعى اپتاپ سولتۇستىك قازاقستاندى دا اينالىپ وتكەن جوق. ەلىمىزدە جينالاتىن بارلىق استىقتىڭ تورتتەن ءبىرىن بەرەتىن ءوڭىر ەگىنشىلەرى 10-15 كۇن بويى تۇرىپ العان 30-35 گرادۋستىق مي قايناتار ىستىقتان, قۇرعاقشىلىقتان جارىلا باستاعان جەرلەردى كورىپ قاتتى ساسقان.
العاشقى ىستىق ءتىپتى مامىر ايىندا بولىپ, ەگىس ءجۇرىپ جاتقانداعى توپىراق قارا بوران بولىپ اسپانعا كوتەرىلىپ جاتتى. توپىراق باسقان ديقانشىلاردىڭ كوزى شاحتەرلەردەن كەم بولعان جوق. ءدان بايلانا باستاعان ءسۇت تارىزدەس اق ۋىز شاقتاعى ىستىق, مامانداردىڭ ايتۋىنا قاراعاندا, ونىڭ 20-30 پايىزىن بۋلاندىرىپ جىبەردى. قازاق اۋىلدارى عانا ەمەس, مۇسىلمان تۇرعىندارى بار بارلىق ەلدى مەكەن جاپپاي تاساتتىق بەرىپ جاتتى. كەيبىر اۋىلداردا حالىقتىڭ تىلەگى قابىل بولىپ, قارا نوسەر قۇيىپ كەتكەندەرى دە بولدى. بىراق اپتاپ ىستىقتىڭ بەتى ۇزاق ۋاقىت قايتپادى. ءشوپ كۇيىپ كەتتى. قۇراعى بەلۋاردان كەلىپ, جايقالىپ تۇراتىن القاپتار جارىلىپ, ءشوبى سارى كۇيىككە اينالعان.
بىراق اۋىرىن بەرگەن جاراتقان جەڭىلىن دە بەرىپ جاتىر. قازىر – شىلدەنىڭ ورتاسى. ءداننىڭ تولىعا باستاعان شاعى. 11-نەن باستاپ ۇزبەي جاۋىپ تۇرعان جاڭبىر ەگىستىڭ وسۋىمەن قوسا ءدانىنىڭ تولىعۋىنا دا جاقسى ىقپال ەتىپ تۇر. سوندىقتان سولتۇستىكقازاقستاندىق ديقاندار بيىلعى استىقتان دا دامەلى. ماساق از بولعانىمەن ءدان تولىق بولىپ, بيدايى ساپالى بولار دەسىپ ءجۇر.
وبلىستاعى 7 مىڭ گەكتار القاپقا استىق ەگەتىن داڭعايىر ديقانداردىڭ ءبىرى جومارت وماروۆ كۇزگى بەرەكەسى بولسا بيىلعى استىق جامان بولمايدى دەپ جورامالدايدى. ول ءشوپتىڭ دە قايتادان قاۋلاپ شىعىپ كەتۋىنەن ءۇمىتتى.
سولتۇستىك ءوڭىر ديقاندارى قازىر ەگىس دالاسىن ارتاراپتاندىرۋعا قاتتى كىرىسكەن. قازىر مۇندا ءبىر ملن گەكتار القاپقا دەيىن مايلى داقىلدار ەگىلگەن. رەسپۋبليكاداعى بارلىق مايلى داقىلداردىڭ ۇشتەن ءبىرىن وسى وبلىس بەرەدى. سونىڭ ىشىندە كۇنباعىس, قاراقۇمىق, بۇرشاق القاپتارى جىل سايىن ارتۋدا. بۇلار ءداندى داقىلداردان كەش جينالادى. قازىرگى جاڭبىرلار ولاردىڭ تولىعۋىنا دا يگى اسەرىن تيگىزۋگە ءتيىس.
بىلتىر سولتۇستىكقازاقستان- دىقتار 4,5 ملن توننا استىق العان. گەكتار بەرەكەلىگى 15 تسەنتنەردەن اينالعان. بىراق بيىل ول مەجەدەن 20 پايىزداي تومەن بولاتىنى قازىردىڭ وزىندە كورىنىپ تۇر. بيىل قازاقستان 8 ملن توننا استىقتى ەكسپورتقا شىعارۋدى جوسپارلاعان. ارينە, بيىلعى اپتاپ بۇل مەجەنىڭ ورىندالۋىنا جىبەرمەسى حاق.
وبلىستىق اۋىل شارۋاشىلىعى باسقارماسىنىڭ اگرونوميا ءبولىمىنىڭ باسشىسى باقتيار توقجىگىتوۆ بيىلعى قۋاڭشىلىق ءبىزدىڭ وبلىس ديقاندارىنا بالەندەي زيانىن تيگىزبەي, استىق بىلتىرعى مەجەدەن ءسال كەم بولعانىمەن جالپى جامان بولمايتىنىنا سەنىمدى. «زەنچەنكو ي ك» كس, «تۇقىم» جشس, «نوۆوميحايلوۆسكوە 2003» جشس سياقتى تۇعىرى بەرىك, شارۋاسى مىعىم دەپ ەسەپتەلەتىن اگروقۇرىلىمدار بيىل دا بيىك مەجەدەن تابىلۋى ءتيىس. ولار حيميالىق تىڭايتقىشتاردى دا ءدال ۋاقىتىندا ءسىڭىرىپ, استىق القاپتارىن مەرزىمىندە كۇتىپ وتىرعانىن ايتادى ول. ءبىز دە ماماننىڭ ايتقانى ورىندالۋىن تىلەپ وتىرمىز.
سولتۇستىك قازاقستان وبلىسى