قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ۇەۇ جانە ازاماتتىق سەكتور وكىلدەرىمەن كەزدەسۋ بارىسىندا الداعى ۋاقىتتا سۋ مولشەرى تومەندەۋى مۇمكىن ەكەنىن ايتتى, دەپ حابارلايدى Egemen.kz.
جيىن بارىسىندا مينيستر سۋ رەسۋرستارىن باسقارۋ ماسەلەلەرىنە توقتالىپ, وزەندەر اعىنى قالاي قالىپتاساتىنىن ءتۇسىندىردى.
«وزەن رەسۋرستارىنىڭ ناقتى كورسەتكىشتەرى سوڭعى جىلدارى شامامەن 90-100 تەكشە مەتردى قۇرايدى. ونىڭ ىشىندە 51,8 تەكشە مەترى جەرگىلىكتى اعىن, 39,2 تەكشە مەتر قىتايدان, سونداي-اق ورتالىق ازيا ەلدەرىمەن رەسەيدەن ترانس شەكارالىق وزەندەر ارقىلى كەلىپ تۇسەدى. 3,5 مىڭنان استام كەن ورىندارىندا جىلىنا 15,5 تەكشە مەتر كولەمىندە جەراستى سۋلارىنىڭ قورى بار. گەوگرافيالىق تۇرعىدان ولار بىركەلكى بولىنبەگەن», دەدى ماعزۇم مىرزاعاليەۆ.
مينيستر ەكولوگيالىق قاجەتتىلىككە شامامەن 50 تەكشە مەتر سۋ قاجەت ەكەنىن دە ايتتى. ال پايدالانىلاتىن سۋدىڭ جالپى كولەمى 25 تەكشە مەتردى قۇرايدى ەكەن. ونىڭ ىشىندە اۋىل شارۋاشىلىعىنا - 15 كۋب كم, ونەركاسىپكە - 6, كوممۋنالدىق شارۋاشىلىققا - 1 كۋب كم تيەسىلى. سونداي-اق تاسىمالداۋ كەزىندەگى شىعىن - 3 كۋب كم تەڭ.
«بۇگىنگى تاڭدا ەلدەگى سۋمەن قامتۋ ەكونوميكالىق سالالاردى قاناعاتتاندىرىپ وتىر. دەگەنمەن الداعى ۋاقىتتا سۋ مولشەرى تومەندەۋى مۇمكىن. ول سۋدى كوپ مولشەردە تۇتىنۋ مەن كەيبىر ەلدەردىڭ سۋدى بولۋىنە بايلانىستى. وعان قوسا ينفراقۇرىلىمنىڭ ەسكىرۋىن ەسكەرسەك, سۋ شىعىنى كوبەيەدى دەپ كۇتىلۋدە. ماسەلەن, اۋىلدى جەردەگى كانالدارداعى سۋ شىعىنى 45%-عا دەيىن جەتۋى مۇمكىن. سۋ شىعىنىن ازايتۋ ءۇشىن سۋ ارنالارىنا جەدەل تۇردە جوندەۋ جۇمىستارىن جۇرگىزۋ كەرەك», دەدى ەكولوگيا, گەولوگيا جانە تابيعي رەسۋرستار ءمينيسترى.
مينيستر سۋ بالانسىن 90-100 كۋب كم دەڭگەيىندە ۇستاپ تۇرۋ ءۇشىن الدىمىزدا 2030 جىلعا قاراي قوسىمشا سۋ رەسۋرستارىن پايدالانۋ, سۋ رەسۋرستارىن تسيفرلاندىرۋ ارقىلى سۋدى ۇنەمدەۋ مىندەتى تۇرعانىن ايتتى.