«تۋر دە فرانس» كوپكۇندىگىنىڭ 16-كەزەڭى نەمىستەردىڭ «BORA-hansgrohe» كلۋبى ساپىندا ونەر كورسەتەتىن اۋستريالىق سپورتشى پاتريك كونرادتىڭ جەڭىسىمەن اياقتالدى, دەپ حابارلايدى Egemen.kz.
29 جاستاعى اۋستريانىڭ ۆەلوشاباندوزى اندوررا مەن فرانتسيانىڭ شەكارالارىندا ورنالاسقان ەل-پاس-دە-لا-كاسا مەن سەن-گودەنس قالالارى ارالىعىنداعى 3 250 شاقىرىمدىق قاشىقتىقتى 4 ساعات 01 مينۋت 59 سەكۋندتا ءجۇرىپ ءوتتى. راسىندا دا, بۇل جولى كونرادتىڭ قارقىنى وتە كۇشتى بولدى. ەكىنشى ورىندى يتاليالىق سونني كولبرەللي («Bahrain-Victorious») يەلەنسە, اۋستراليالىق مايكل مەتيۋز («Team BikeExchange») ءۇشىنشى ساتىعا تابان تىرەدى.
«استانا» كلۋبى مۇشەلەرى اراسىندا ەڭ ۇزدىك كورسەتكىشكە الەكس ارانبۋرۋ قول جەتكىزدى. قازاقستاندىق كوماندانىڭ ساپىنداعى يسپانيالىق لەگيونەر مارەگە التىنشى بولىپ جەتتى.
جالپى ەسەپتە تادەي پوگاچار («UAE-Team Emirates») الدىنا جان سالار ەمەس. 22 جاستاعى سلوۆەنيانىڭ سايىپقىرانى توعىز تۋر بويى تىزگىندى ەشكىمگە بەرمەي كەلەدى. ونىڭ ۋاقىتى – 66:23:06.
«استانانىڭ» سەركەسى الەكسەي لۋتسەنكو ازىرگە جەتىنشى ورىندى قاناعات تۇتۋدا. جەرلەسىمىز كوش باسىنداعى سپورتشىدان 7 مينۋت 01 سەكۋند قالىپ كەلەدى.