2021 جىلدىڭ ءۇشىنشى توقسانىندا الەۋمەتتىك تولەمدەردىڭ ءۇش ءتۇرىن رەسىمدەۋ ءۇشىن مەملەكەتتىك قىزمەتتەر كورسەتۋدىڭ ەكستەرريتوريالىق قاعيداتى ەنگىزىلەتىن بولادى.
قازاقستاندىقتار تۇراقتى تىركەۋ مەكەنجايىنا قاراماستان, ەلىمىزدىڭ كەز كەلگەن حقو-نا جۇگىنە الادى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە «ازاماتتارعا ارنالعان ۇكىمەت» مەملەكەتتىك كورپوراتسياسى توراعاسىنىڭ ورىنباسارى ءبىرجان ءجۇنىسوۆ ايتتى.
قازىر تۇراقتى تىركەۋ جەرىنە قاراستى حقو-عا جۇگىنۋ – الەۋمەتتىك تولەمدەردى رەسىمدەۋدىڭ باستى تالابىنىڭ ءبىرى.
«مەملەكەتتىك قىزمەتتەردى كورسەتۋ ۇدەرىسىن تسيفرلاندىرۋ باعىتتارىنىڭ ءبىرى – اۋماقتان تىس قاعيداتتى ەنگىزۋ. ءۇشىنشى توقساندا وسى قاعيدات ارقىلى قازاقستاندىقتار بالانىڭ تۋىلۋىنا جانە بالا كۇتىمىنە بايلانىستى جاردەماقىنى, جۇكتىلىك پەن بوسانۋعا, جاڭا تۋعان ءسابيدى اسىراپ الۋعا بايلانىستى كىرىستەرىن جوعالتقان جاعدايدا الەۋمەتتىك تولەمدەر الۋعا ءوتىنىش بەرە الادى جانە ءبىر جاسقا تولعان كەزدە بالانى كۇتۋگە بايلانىستى تابىسى جوعالعان جاعدايدا, تىركەۋ ورنىنا قاراماستان, ەلدىڭ كەز كەلگەن حالىققا قىزمەت كورسەتۋ ورتالىعىنا قۇجات وتكىزە الادى. جىل سوڭىنا قاراي ءبىز باسقا تولەمدەر بويىنشا دا ەكستەرريتوريالىق قاعيداتتى ەنگىزۋدى جوسپارلاپ وتىرمىز», دەدى ءبىرجان ءجۇنىسوۆ.
2021 جىلدىڭ ءبىرىنشى جارتىجىلدىعىندا «ازاماتتارعا ارنالعان ۇكىمەت» الەۋمەتتىك سالادا 815 مىڭ مەملەكەتتىك قىزمەت كورسەتتى. جالپى, مەملەكەتتىك كورپوراتسيا تولەمدەردىڭ 44 ءتۇرى بويىنشا ەلەكتروندى ءىس ماكەتتەرىن قالىپتاستىرادى جانە مىندەتتى زەينەتاقى, الەۋمەتتىك جانە مەديتسينالىق اۋدارىمدار بويىنشا دەربەستەندىرىلگەن ەسەپ جۇرگىزەدى.
«ەگەمەن-اقپارات»